Minister Glenbert Croes
*ful e zona di refineria ta bay bira e industria di energia
ORANJESTAD (AAN): Minister Glenbert Croes a elabora durante su rueda di prensa riba tur e plannan cu e tin pa e sector energetico pa Aruba cu lo bira e di dos pilar economico pa nos Pais.
E mandatario a expresa e determinacion cu Gobierno di Aruba tin pa haci nos soñonan grandi bira realidad. Y locual cu semper tabata instrumental pa Minister Glenbert Croes tabata pa haya companianan di renombre y trayectoria indiscutibel, pa compaña nos den haci e visionnan energetico pa Aruba realidad.
Aruba Hydrogen Valley finalmente e mandatario por anuncia na nos comunidad cu Aruba Hydrogen Valley ta bay wordo desaroya pa cual a identifica Acciona Energia di Spaña como e prome compania cu cual Aruba lo cuminsa e desaroyo aki.
Full e zona di refineria ta bay bira e industria di energia. E zona aki lo consisti di mas di varios compania cu lo ta invirtiendo den diferente componentenan di loke ta bay bira e industria energetico di futuro. Locual cu e mandatario a comparti cu henter nos comunidad y principalmente cu e comunidad di San Nicolas ta cu e huma preto di pasado cu e refineria tabata expulsa, lo no bin bek.
Esaki lo wordo reemplasa cu e huma blanco di energia limpi, sin contaminacion, sin emision, cu na mes momento lo representa desaroyo, progreso y hopi mas prosperidad cu ta contribui na e calidad di bida di tur ciudadano di San Nicolas y tur ciudadano di nos pais Aruba.
Compania Acciona Energia lo ta na Aruba pa haci su prome assessment y quick scan
Riba e pregunta di un miembro di prensa di cuanto tempo e proyecto di Aruba Hydrogen Valley lo dura pa por bira realidad, e mandatario a continua splicando cu Utilities N.V. cu ta trekker di e proyecto aki di parti di Aruba como tambe Sr. Patrick Cnubben di Hulanda, ta basta avansa caba. Despues di semana santa e compania Acciona Energia lo ta na Aruba pa haci su prome assessment y quick scan di loke ta e vision di realisacion di Aruba Hydrogen Valley. Hidrogeno ta e energia di futuro pa cual e decisionnan mester wordo tuma awo. E Aruba Hydrogen Valley no solamente mester provee e necesidad y consumo local pero tambe pa por drenta e mercado di exportacion di hidrogeno pa region. E futuro ta awo!
Cu gran conviccion e mandatario a clausura cu e mensahe aki su rueda di prensa.
