CUCUTA: Autoridadnan Colombiano na e ciudad aki cu ta na frontera cu Venezuela, ta siguiendo paso di contrabandistanan cu ta tratando di pusha tur clase di remedi pa drenta Venezuela.
Den un siman di tempo, nan a confisca remedi cu ta yega na un balor di 278 miyon Pesos Colombiano.
Den e cargamento aki a haya tambe remedi contra cancer, y tambe remedi pa alivia presion halto di sanger.
Polisnan a tene un razzia den centro di Cucuta den un operacion cu nan a yama ‘Operacion Plan Navidad”, y asina a bin haya 2.500 remedi contra hipertension, y 10 remedi hopi caro cu ta wordo usa pa trata Cancer.
E remedinan aki tabata wordo hiba di contrabanda, pa wordo distribui na Venezuela sin cumpli cu tur protocol di seguridad cu e remedinan aki tin mester di dje. Nan tabata rumbo pa Venezuela, y no sa si acaso e lo tin otro pais como destino final.
Tambe a haya 500 unidad di petchi special pa pone riba cabez, y mas di 2 miyon di banchi di elastiek pa cabey. Ningun di e articulonan aki ta conta cu documentonan exigi pa tipo di mercancia aki.
