Segun señor Rino Hermans:
ORANJESTAD (AAN): Director di Crisis Management Office (CMO), señor Rino Hermans, den un entrevista cu DIARIO a duna di conoce cu CMO ta prepara pa cualkier eventualidad cu por influencia Aruba na un manera directo of indirecto debi na e situacion na Venezuela.
CMO ta prepara tanto pa e masa migratorio como pa e consecuencianan cu por surgi den transicion pa structura. E ultimo aki, señor Hermans a remarca, historicamente a demostra na paisnan entre otro na Iran, Iraq y Afganistan, cu, na momento cu un extradiccion di un hefe di estado a tuma luga, e pais ta bira un tiki instabil.
Segun señor Hermans a enfatisa, CMO ta constant bezig cu crisis Venezuela desde aña 2006 y ta monitoria y ta activo riba e situacion actual tambe y ta preparando e organizacion pa cualkier eventualidad. CMO cuminsamento di siman aki a presenta na Parlamento pa duna nan un bista riba e plannan di CMO na unda nan a indica kico ta e consecuencianan cu e Parlamentarionan mester tene cuenta cu ne pa por opera y funciona den un situacion di crisis.
Esaki, el a enfatisa, ta un forma di procede pa mantene tur hende prepara y informa, no solamente di e situacion geopolitico entre Merca y Venezuela pero pa tur otro situacion na Aruba, manera tabata e caso tambe den tempo di Covid. “Importante ta pa tur hende ta informa di e plannan y contribucion di CMO pa e siguridad di pais Aruba”, señor Hermans a enfatisa.
