ORANJESTAD (AAN): Mediante un caso sumario na augustus 2020, cu habitante di bario Anouk Balentina a entama,
hues civil a ordena pa para establecimento y testmento di e incinerator na Parkietenbos inmediatamente.
Den dicho veredicto hues civil a confirma cu gobierno a actua “onrechtmatig” (contra ley) contra (entre otronan) Balentina y su famia door di a opera e incinerator na Parkietenbos sin permiso di molester. Consecuentemente, gobierno a haye obliga na inicia e proceso pa otorga un permiso di molester pa por opera e incinerator na Parkietenbos.
Balentina hunto cu 80 otro, a protesta contra e concepto di e permiso. Sinembargo gobierno a dicidi di otorga e permiso aki dia 23 di december 2020, den secreto, sin anuncia: atrobe sin tene cuenta cu e procedura prescribi den ley. Ta ora Balentina a solicita informacion tocante e avance di otorgamento di e permiso pa medio di un asina yama “Lob-verzoek”, a resulta cu ya esaki a ser otorga secretamente.
Siguientemente Balentina a entrega obhecion contra e permiso en cuestion. Gobierno, na su turno, no a considera necesario pa reacciona riba e obhecion aki y a laga e termino legal pa haci esaki vence. Di acuerdo cu e Landsverordening Administratieve Rechtspraak (LAR) e falta di reacciona riba un obhecion ta ser clasifica como un decision negativo (ficticio), contra cual por apela cerca e hues administrativo via LAR. Esaki ta hustamente locual Balentina a haci.
Hues administrativo a duna gobierno plaso pa presenta un defensa. Sinembargo, un biaha mas gobierno no a considera necesario pa reacciona y no a presenta un defensa.
Recientemente, 6 di juli 2022, hues administrativo ta dicta cu e apelacion di Balentina ta funda. Hues ta destrui e decision negativo di gobierno y ta duna orden na gobierno pa dentro di tres luna tuma un decision (real) riba e obhecion cu Balentina a entrega.
Sinembargo den e caso menciona, apesar cu gobierno a faya repetidamente y e proceso largo (casi dos aña) cu ciudadano mester a encamina pa por yega na e hues administrativo, toch hues ta opta pa no evalua e caso den su contenido y legitimidad (“rechtsmatigheidstoets”).
Na Aruba gobierno ta keda haya chens. Na otro islanan di Reino Hulandes si tin posibilidad pa e ciudadano acudi directamente na e hues administrativo contra un decision di gobierno pa e asina jama “rechtmatigheidstoets” sin mester entrega obhecion prome na gobierno. Esaki ta scapa tempo, frustracion y vooral ora derechonan fundamental di e ser humano ta den cuestion esaki ta crucial.
Alabes e hecho cu e hues administrativo no ta provee un “dwangsom” (multa) den caso cu no ta cumpli cu e termino stipula, ta duna gobierno tur e espacio pa sigui faya.
Awor e proceso tin cu cuminsa ful di nobo unda cu por afirma cu siguridad cu atrobe gobierno lo trata di tranca y frustra e proceso di tur forma posibel pa sigi opera e incinerator cu no ta cumpli cu ley- y regulacionnan existente trapando derechonan fundamental e.o. trankilidad y salud di habitantenan di e area.
Ban spera cu gobierno lo comporta su mes e biaha aki y cumpli cu e veredicto. En todo caso, e lucha pa husticia pa habitantenan di vecindario di Parkietenbos y medioambiente lo mester continua.
