ORANJESTAD (AAN): Loke a cuminsa na aña 2010 como un evento local gratis na Village Mall cu bandanan local, a crece bira un estilo di bida y un di e experiencianan di entretenimento mas spera riba nos isla.
Awo celebrando su di 12 edicion, Flip Flop Festival ta sigui evoluciona den un miho experiencia dia 6 di juni proximo. E aña aki agrupacionnan local, DJnan y MCnan local, lo comparti e escenario di Harbor Arena cu e cantantenan internacional Machel Montano y Myke Towers.
Cu sosten di Tropical Bottling Company y Brouwerij Nacional Balashi cu nan producto “Chill”, a crea e concepto Flip Flop pa ofrece un evento accesibel unda musica y entretenimento, tanto local como imternacional, por bini hunto pa brinda e publico un experiencia inolvidabel.
Durante e evento, Chill lo tin un presencia fuerte cu diferente activacion diseña pa envolvi e publico durante henter e anochi. E fanaticonan por spera regalonan exclusivo, gadgets y experiencianan interactivo cu ta agrega mas energia na e evento. Chill lo sorprende e publico cu momentonan special y promocionnan, creando un scenario cu ta refleha e ambiente vibrante di Flip Flop.
