ORANJESTAD (AAN): E compania local CATC-HCC ta anuncia awe cu desde 1 di januari 2022 tin cambio den e nomber di compania y den maneho di e oficinanan na Aruba y St. Maarten.
E maneho diario di e oficina na Aruba lo ta den mannan di Robin Roossien, Mireille de Miranda y Reint Roossien.
Norman Henriquez lo ta encarga cu e maneho di e oficina na St. Maarten.
Na 2018, e dos empresanan líder den contabilidad, CATC (funda na 1994) y HCC (funda na 1968) a uni cu exito bou e nomber CATC-HCC.
Recientemente, CATC-HCC a dicidi di expande e directiva cu 2 persona y re-brand cu cambio e nomber pa CATC (Caribbean Accounting & Tax Consultants).
E actual director y fundador di CATC-Group, Reint Roossien, ta satisfecho cu e entrada na e directiva di un generashon nobo. Aki el a declara: “E directora nobo di CATC, Mireille de Miranda, den pasado ya tabata activo na CATC como fiscalista. Despues di a traha durante varios aña como asesora fiscal senior na un di e Big 4 nan, el a dicidi na 2019 pa bolbe na CATC, hunto cu e experiencia acumula como Managing Partner Tax & Legal; nos ta hopi contento cu ne!”
“Ademas, mi ta complaci di wak mi yiu homber Robin, kende a studia International Business & Entrepreneurship na e Universidad di Tampa, demostra e ultimo añanan cu e ta cla pa asumi e reto como director na CATC.”
“Mas cu claro, lo mi keda participa por lo pronto den e asuntonan y maneho diario di CATC, pero cu e sentimiento agradabel cu personanan capacita ta dirigiendo e compañía den mi ausencia. Pero lo mas importante ta cu despues di e reorganizashon aki, nos lo por sirbi nos cliente nan mihor ainda cual lo ta e tarea esencial y principal di e directiva nobo.”
El a finaliza bisando: “Cu ayudo di nos nomber reconoci y confiabel esaki lo funchona sin duda, tanto na Aruba, como na St. Maarten, Curacao y Bonaire!”
