Detencion di ruman di Tico Croes den caso relaciona cu Otmar Oduber --- *Tico y Otmar tabata parti di e caso Fondo Desaroyo Nobo San Nicolas --- *Detencion Fito Croes a rementa un pagara den mundo politico di Aruba
ORANJESTAD(AAN)—E detencion di Humphrey (Fito) Croes ayera na Aruba, a rementa un pagara den mundo politico di Aruba, cu na Siglo 21 a presenta un angulo politico, cu durante eleccion 2021 na Aruba a haya hopi atencion den sala di Corte di Husticia ora Huez a mustra con hasta urna electoral por habri porta pa corupcion politico.
Ora Aruba ayera a tuma nota cu ruman di ex Ministro Tico Croes a wordo detene den e caso cu ta haci mencion di ex Ministro Otmar Oduber tambe, Aruba a recorda e caso cu na inicio di decada 21 a hiba gobierno Henny Eman dilanti Huez.
Tico Croes tabata Ministro di AVP e tempo aki y mester a presenta dilanti Huez.
Tico Croes a wordo condena dor di Huez den e caso cu a termina na un forma sorprendente prome cu eleccion cu a pone Mike Eman na poder na 2009.
Otmar Oduber cu tabata presta labornan na e oficina di Ministro Tico Croes, tambe a wordo persigui den e caso Fondo Desaroyo San Nicolas y a sali liber.
E caso Fondo Desaroyo Nobo San Nicolas tabata basa riba un pakete di proyecto cu a wordo investiga dor di Algemene Rekenkamer Aruba.
Despues di e caso aki, Mike Eman a lansa su mes como lider di AVP den eleccionnan 2009 cu e promesa di deshaci di BBO.
Otmar Oduber a bira Ministro den Gabinetenan di Mike Eman, pero den e segundo gabinete a kibra cu e partido berde.
Tereno den e Gabinetenan di Mike Eman tabata den man di Benny Sevinger, cu awe ta wordo persigui dor di Husticia pa e forma cu el a atende cu tereno for di 2009 pa 2017 como Ministro pues di Gabinete Mike Eman 1 y 2.
Na 2017, tabata Otmar Oduber cu a bira Ministro di Infrastructura, encarga cu asuntonan di tereno.
Esaki ta nifica cu Otmar Oduber, a hereda e maneho di tereno di Benny Sevinger, cu awor ta wordo persigui dor di Husticia den e caso Avestruz.
Pero Otmar Oduber tambe tabata parti di Gobierno Mike Eman tempo cu Benny Sevinger tabata encarga cu tereno, pa cual temporada Benny Sevinger ta wordo acusa tambe di entre otro corupcion.
Na e momentonan aki autoridad a cuminsa detene personanan den cuadro di e investigacionnan cu a haya e nomber Caso Flamingo y den cual Otmar Oduber como Ministro encarga cu tereno despues di Benny Sevinger, ta wordo considera sospechoso, manera accionnan di Ministerio Publico ta demostra.
Na momento cu autoridad a anuncia ayera cu un ruman di Tico Croes a wordo detene den e caso Flamingo, pues Fito Croes, un situacion sumamente interesante a presenta.
E investigacionnan entorno tereno a haya un punto sumamente interesante den desaroyonan politico na momentonan cu hopi pregunta ta surgi entorno politica y integridad.
Caso Ibis di permiso y caso Avestruz di Tereno, tabata bou maneho di e partido AVP, cu tabata encarga tambe cu e proyectonan Bo Aruba cu mescos cu e caso Fondo Desaroyo Nobo San Nicolas, ta mishi cu e Ley di Contabilidad cu ta regla e forma cu por gasta placa di Pueblo.
Den e caso Flamingo, ruman di Tico Croes cu tabata Ministro pa AVP y a wordo condena dor di Hues, ta wordo persigui dor di autoridad cu a cuminsa investiga Otmar Oduber manera por conclui a base di loke ta investigacion oficial.
DIARIO lo sigui tur desaroyo pa mantene Aruba bon informa.
