Den eleccion por cumpra un Miembro di Parlamento y kibra control
*Sistema actual ta habri caminda pa miho corupcion den gobernacion
*Corupcion por pone presion cual candidato ta haya cual Ministerio
ORANJESTAD(AAN)—E sistema politico cu ta dicidi pa e forma cu Aruba ta wordo goberna, basicamente ta un copia di e sistema politico Hulandes cu ta duna Parlamento e derecho pa dicidi riba e personanan cu lo ta encarga cu e gobernacion diario di e pais, pues Ministronan.
Un formula cu realmente no ta carni ni pisca pero si por wordo considera como un mas y miho posibilidad pa corupcion politico.
Aruba como un Teritorio Insular a conoce un gobernacion di Conseho Insular y un Bestuurscollege, cu tabata directamente mara na Conseho Insular ya cu e mayoria di e Diputadonan mester tabata Miembro di Conseho Insular tambe y como tal tabata participa na votacion.
E caso Avestruz, despues di e Caso Fondo Desaroyo Nobo San Nicolas y di Permiso, ta exigi nos para keto y puntra nos mes si no mester cambia e sistema cu Pueblo ta eligi su representantenan y cu ta habri porta directamente pa corupcion.
Den pasado na diferente ocasion nos a mustra di ta na fabor di eleccionnan separa pa Parlamento y pa Gobierno.
Segun e sistema actual di politica na Aruba, un candidato riba un lista politico cu ta participa na eleccion, ta wordo eligi dor di Pueblo pa bira Miembro di Parlamento, pues controlador di e trabou cu Gobierno mester bay haci segun e programa di gobernacion cu e partido politico entrega.
Kico esaki ta nifica?
Tras di cortina di partidonan, wega sushi por cuminsa cu representacion directo di Pueblo, cu ta Parlamento.
E partido cu gana eleccion, ta produci Miembro di Parlamento na prome lugar.
Si e partido gana cu un mayoria absoluto, e ta e unico partido cu ta dicidi kende ta bira Ministro. Hasta e partido por dicidi cu ningun di e Miembronan di Parlamento ta bira Ministro y bini por ehempel cu un asina yama Zakenkabinet.
Pues corupcion ta cuminsa cu eleccion di Miembro di Parlamento, cu segun Constitucion mester ta e aparato di control di Pueblo y asina percura pa bon gobernacion y nada di corupcion!
Aki ta caminda e rabo di porco ta krul cu sistema politico actual na Aruba.
Cual Miembro di Parlamento a wordo cumpra prome cu eleccion pa asina e por sostene e Ministro cu e partido ta bay nombra den cierto funcion si e partido gana eleccion?
Naturalmente cualkier persona por practica mentira enfrente su partido, cu tin e deber di garantisa Pueblo cu su gobernantenan ta limpi.
Pero tanto den e caso di Fondo Desaroyo Nobo San Nicolas como den e caso penal contra ex Ministro Paul Croes di AVP como den e caso di Benny Sevinger, mester parti for di e punto di bista cu prome cu eleccion (manera ta normal) ya internamente e partido a dicidi, kende lo ta e candidatonan pa Ministro si nan haya oportunidad pa forma Gobierno.
Ora papia di crimen organisa pues na forma Mafioso pa uza e palabra Arubano cu nos tur ta comprende bon, mester mira e implicacion grandi di palabranan di Huez cu a yama Benny Sevinger un araña den un neishi, cu realmente a sorprende Aruba.
Mester conclui cu Husticia a haci un tremendo trabou den su investigacionnan di Caso Avestruz cu no por tabata nada facil ya cu ta cu e podernan cu ta uni y ta dicidi pa resultado di eleccion, ta atende den e tipo di casonan aki.
Pues no mester cuestiona solamente e conocemento di e Ministro Presidente di cualkier acto den gobernacion di Aruba, pero tambe di e Miembronan di Parlamento di un partido.
Ta Parlamento y no Pueblo ta dicidi riba Ministronan. E realidad aki ta duna mas motibo pa profundisa den nos sistema politico cu mester cambia.
Mester separa eleccion pa Parlamento for di eleccion pa Conseho di Ministro pa asina e Miembro di Parlamento por ta controlado cu no ta haya oportunidad directo pa como Ministro haci fabor na sostenedornan di partido.
Con un man por duna otro segun e sistema politico actual? E votador por bende su voto cu un partido. E sostenedor financiero di partido ta sostene e candidato cu placa y asina ta sostene e posibel Miembro di Parlamento cu placa, cu finalmente ta resulta pago na e persona cu bira Ministro.
E prome paso grandi pa elimina oportunidad di corupcion politico ta, separa eleccion di Parlamento for di eleccion di Gobierno, pa asina garantisa mayor integridad den Parlamento cu ta e instancia cu a permiti Contracto cu Citgo, cu a permiti Gobierno Mike Eman destrui futuro di Aruba cu debe nacional y e instancia cu a permiti casonan di corupcion!
