Sin Benny Sevinger no por tabata tin otro acusado segun acusacion
*AVP a pone duda den trabou di tur investigador den caso Avestrus
*Basicamente Huez mester dicta sentencia contra resultado eleccion
ORANJESTAD(AAN)—14 di April 2023 lo bira e dia cu un veredicto di Huez no solamente ta dicidi si un gobernante ta corupto of no y mester bay prison, pero tambe lo entrega e prueba cu Aruba mester conoce reforma di e sistema electoral.
Na momento cu e caso Avestrus conoce e prome desenlace legal segun nos sistema hudicial, un veredicto di Huez lo dicidi si e acusado Benny Sevinger a abusa di e confiansa cu Pueblo a pone den su persona pa dirigi e pais.
Esaki ta e acusacion basico cu ta bini dilanti den e diferente acusacionnan criminal den e caso Avestrus, cu a entrega na Aruba (den e presentacionnan den Corte) un pelicula di e mundo scondi tras di un eleccion.
Pa analisa e impacto grandi di e veredicto di Huez riba e sistema democratico pa gobernacion di Aruba, mester realisa cu si e acusacionnan ta berdad, bofon a wordo haci di democracia.
Ora papia di democracia, gobernacion di Pueblo, ta papia di gobernacion na interes di henter Pueblo y no solamente e grupo cu ta capaz pa pasa placa bou mesa.
Segun nos sistema di gobernacion, Parlamento cu Pueblo ta eligi directamente, mester controla e gobernantenan cu e ta pone den nan puesto.
Parlamento no ta wordo eligi a base di personanan individual cu ta postula nan mes como candidato pero a base di un lista di un partido politico cu ta keda e organo central den e proceso electoral.
Esaki ta haci cu e partido politico mester percura pa e personanan riba su lista pa eleccion ta intachabel y mester percura cu como gobernante of den Parlamento, nan ta traha na forma integro pa bienestar di Aruba.
Na e momento cu AVP a nenga di exigi pa Benny Sevinger retira na momento di su acusacion, AVP a pone duda den e integridad y trabou di henter e aparato hudicial cu a persigui Benny Sevinger.
Tur hende por wordo acusa y hasta detene pa acusacion falso dor di enemigo, manera AVP mester sa ya cu entre otro ta hopi graduado den ley ta forma parti di AVP. Pero pa sigui tene un persona den detencion, mester sigui un proceso legal, manera a keda demostra den e caso Avestrus cu a permiti Benny Sevinger keda cu su entrada mensual di Parlamento.
Mientrastanto hasta abogado di Benny Sevinger mes a bisa cu algo a pasa y Benny Sevinger a declara su mes victima di otro acusadonan contra kende tambe sentencia lo wordo dicta.
Ley ta exigi pa AVP, como partido cu ta haci participacion di Benny Sevinger na eleccion y den Parlamento posibel, keda responsabel pa e calidad di Gobernante of Representante di Pueblo cu nan ta pone.
Mike Eman no tabata tin necesidad di publicamente sostene Benny Sevinger y exigi Pueblo biba cu un acusado como su Representante, te awe.
Benny Sevinger ta e cara di AVP, cu tabata tin e deber di vigila e trabou cu Benny Sevinger haci na nomber di Pueblo den Parlamento y den Gobierno.
Si AVP kier a impone su boluntad sin cu Benny Sevinger tabata di acuerdo, Benny Sevinger mester a tuma su retiro pasobra ta riba lista di AVP a haya voto pa e ta den Parlamento. Como representante di AVP, Benny Sevinger a bira Ministro y no riba su mes.
Na e momento cu AVP publicamente a exigi pa un acusado den prison, participa na eleccion, el a pone duda den henter e aparato hudicial cu tabata activo den e investigacion y accion legal contra Benny Sevinger y otro acusadonan cu a bisa cu nan ta sostene AVP abiertamente.
Segun e acusacion, sin Benny Sevinger no por tabata tin otro acusado.
E caso Benny Sevinger a duna prueba di buraconan habri den nos Leynan cu a habri caminda pa Huez mester dicta sentencia contra resultado di eleccion si e manda Benny Sevinger prison, loke lo nifica cu Benny Sevinger no por keda den Parlamento.
E sistema democratico di Aruba lo conoce un veredicto e siman aki. Pero for di awor mester considera e sistema democratico di Aruba responsabel cu un acusado den un caso criminal, por tabata un Miembro di Parlamento di Aruba a base di investigacion di un team enorme den cual Arubianonan cu tambe mester a haci nan trabou, no a bisa pa cual partido nan a vota pasobra esey ta keda nan derecho hasta si nan a vota pa AVP!
