Ateliers '89 Punto Di Beyas Arte Aruba ta anuncia:
ORANJESTAD (AAN): Ateliers '89 Punto Di Beyas Arte Aruba, den colaboracion cu The Fresh Milk Art Platform, Barbados y ARC Magazine ta anuncia cu e residencia artistico regional Caribbean Linked VI lo tuma lugar na Ateliers '89, entrante 25 di juli te cu 16 di augustus 2022. E evento oficial di apertura lo wordo realisa diaranson 27 di juli di 7pm - 12am.
Creativonan di henter Caribe di habla frances, spaño, ingles y hulandes lo reuni pa produci obranan, conoce profesionalnan di e comunidad artistico di Aruba, participa den charlanan publico, skirbi un blog riba nan experiencia y presenta un muestra di ciere di obranan durante e periodo aki di tres siman. E evento final y e inauguracion di e exposicion lo tuma lugar diadomingo 14 di augustus.
Caribbean Linked ta un espacio pa crea conciencia den e comunidadnan creativo den Caribe. E residencia aki ta permiti e participantenan pa ta habri na e practicanan di otro artistanan caribense emergente, proporcionando un oportunidad pa fortalece e conexion regional y e entendimento cultural. E edicion presencial aki di Caribbean Linked ta e continuacion di e edicion virtual cu a tuma lugar online na 2021 debido na e pandemia COVID-19, actuando como un aña brug pa algun di e participantenan pa conecta entre nan y realisa discusionnan riba nan trabao prome cu reuni fisicamente e aña aki.
E artistanan participante den Caribbean Linked VI sta Vesuhely Americaan (Curaçao), Claudio Arnell (St. Maarten), Taisha Carrington (Barbados), Romelinda Maldonado (Aruba), Justin Reinir Croes (Aruba/Hulanda), John Reno Jackson (Caiman Island), Sarabel Santos-Negrón (Puerto Rico), Samuel Sarmiento (Aruba/Venezuela) y Béliza Troupé (Guadalupe).
E escritor residente lo ta Ethan Knowles, un academico y escritor emergente di Bahamas cu recientemente a gradua na The American University di Roma (Italia).E curator invitado special di e aña aki ta Sofía Olascoaga, ken actualmente ta miembro di e Sistema Nacional di Creadornan Artistico, 2019-2022 na México, den Practicanan Experimental.
