Edsel Figaroa, presidente di TOPA:
ORANJESTAD (AAN) – Den entrevista cu e Presidente di Sindicato TOPA, señor Edsel Figaroa, a duna di conoce cu FMSA (Fuels Marketing & Aruba Supplies NV, su CAO a caduca dia 2 di juli. No obstante, e sindicato a pidi pa extend’e pa un aña mas.
“Nos tin cu bisa si, cu naturalmente e Gerencia tabata kier pa extende pa un temporada mas largo, pero a base di e logronan cu nos a alcanza, nos a bisa ban evalua otro aña bek anto nos ta wak con nos ta sigui cu ne. Pero pa aworaki a bay bon, nos a caba di firm’e dia 23 di Juni, y e trahadornan a keda contento cu e logro aki”, Figaroa a duna di conoce.
El a agrega cu e CAO aki, aunke no por bisa cu ta esun di miho pasobra semper tin uno miho, tabata basta bon y a satisface e trahadornan di FMSA.
“E ta un di e miho CAOnan cu esnan cu tabata tin. Esey TOPA mes a trah’e como dos aña pasa. E trahadornan ta keda trankil te otro aña na Juni, pero nos kier palabra cu Gerencia, cu nos kier atende cu e CAO desde Januari otro aña, p’asina e ora ey nos tin mas tempo pa ahusta na unda mas nos kier tambe”, Figaroa a menciona.
Edsel Figaroa a señala cu TOPA a scucha cierto rumornan cu tin compania interesa na cumpra FMSA, pero nan punto di bista como sindicato ta, cu tur compania estatal, mester keda den man di gobierno. “Bo no por bende bo baca cu ta duna lechi, pasobra un bez bon bend’e, bo deshaci di dje, bo no tin entrada mas. Nos mester siña nos les di pasado, percura mantene e companianan estatal den man di gobierno”, e lider sindical a remarca.
Pa splica kico ta e situacion, Edsel Figara a indica cu RdA ta e compania madre (e parti cu tin di haber cu petroleo), FMSA tin dos compania: Uno ta Smsa Aviation cu ta zorg pa e fuel a e avionnan, y Smsa Distribution, cu a zorg pa pomp stations. E otro ta e parti unda e producto ta yega. “Kico ta pasa? Cu FMSA ta e compania cu ta produci e lechi, e ta e baca di lechi, bo no por bend’e pasobra bo ta keda cu dos cu no ta produci nada. “Ami ta haya ta na su lugar pa keda cu esun cu ta produci lechi p’asina bo por cubri bo gastonan”, Edsel Figaroa a remarca.
