ORANJESTAD (AAN): Despues cu luna di April a conoce un crecemento di turismo di 20%, ATA ta premira cu lunanan di Mei y Juni tambe lo sigui fuerte pa nos turismo.
Esaki basa riba cierto analisis, segun CEO di ATA Ronella Croes.
El a indica cu despues cu a cera cuartal 1, pa cuartal 2 ta mira un continuacion faborable pa nos recuperacion turistico.
“Nos por deduci cu nos por ta sperando entre 72 y 73% mas turista den cuartal 2 di e aña aki, compara cu cuartal 1”.
Nos ta midiendo tambe diferente desaroyo pa loke ta trata restante di aña, pa asina tira un bista tambe riba kico nos por spera pa e siguiente lunanan.
Haciendo tur e analisisnan aki, e conclusion ta cu si na e momento aki puntra ATA, nos ta den un scenario cautelozamento optimista, segun Croes, kende a sigui bisa cu nos por drenta tambe e scenario optimista y cera 2021 cu un minimo di 60% di recuperacion pa loke ta e cantidad di bishitante compara cu aña 2019, cu ta e ultimo aña normal di nos turismo.
Croes a indica tambe cu e turistanan ta gastando mas durante nan vacacion, mientras cu tur analisis ta indica cu esaki lo continua di ta un tendencia pa aña 2021.
