ORANJESTAD (AAN): E accident tragico di siman pasa na Palm Beach, cu a costa bida di e teenager Cassidy Murray net ora e tabata gozando di e actividad di ‘Tubing’ riba lama riba su ultimo dia di vakantie, a afecta fuertemente su coleganan di scol na Massachusetts na Merca.
E accident di Diaranson siman pasa tabata ora cu un grupo di hende a subi riba un flota di rubber, pa asina diverti mey ora cu loke ta wordo yama ‘Tubing’. Tubing ta un flota cu hende ta sinta riba dje, wantando duro, mientras cu e ta wordo lastra door di un speedboat. Ora di Tubing na momento cu bo pasa riba un ola, esaki hopi biaha ta bay halto y si bo no tin suficiente forza, bo ta wordo ‘benta’ un banda den lama.
Tin indicacion cu Diaranson atardi un poco prome cu 4:00 pm, esaki a pasa cu Cassidy cu a cay durante e Tubing y a cay den lama. Aki ta unda cu investigacion tin di deduci kico a socede, pasobra e speedboat cu ta lastrando e tube a bin bek y e driver a pasa riba Cassidy, y e chapaleta di e motor a dal y kita un braza for di dje completamente.
Cu urgencia esnan di e Tubing a his'e y a bay cune rumbo pa e landing point di nan cu ta net pazuid di De Palm Pier na Palm Beach, net mey-mey di RIU Palace Hotel Aruba, y Hilton Aruba Caribbean Resort. Ademas cu e teenager tabata perdiendo hopi sanger y a bay den shock, personal di rescate a traha alma y cuerpo cu CPR y demas tratonan urgente pa yuda stabiliza e teenager ey riba beach mes, den presencia di su mayornan cu tabata den panico y histerico.
Sinembargo no a logra stabiliza e dama hoben mas, y su curazon no tabata reacciona mas, ni maske kico nan a haci. Esaki a afecta e Paramediconan hopi mes pa mira con bida di un hoben a djis slip door di nan mannan, sin cu nan por a haci nada mas.
DIARIO a compronde cu como cu e braza di e teenager a sink bay abao na fondo, toch autoridadnan a percura pa un team di buceador a baha pa bay buske. Y nan a logra di haye tambe, y a bin bek cune. Pa asina e wordo poni hunto den e Caha di Morto, pa debolbe e restonan mortal di Cassidy bek pa Merca.
Mientras tanto na Massachusetts, na Buckingham Browne & Nicholas private school, tanto mayornan cu studiante y docentenan a reuni pa asina sostene otro y consola otro pa cu e fayecimento di Cassidy, kende ta un alumno di 7th grade di e scol na ciudad di Cambridge.
Cabezante di scol Jennifer Price, a bisa cu studiante y famianan a skirbi hopi carta di condolencia pa nan entrega na e famia. Apenas na September 2021 cu a pasa, Cassidy a cuminza acudi na e scol aki. Su ruman homber Adam ta den 10th grade di e scol. Nan a nota con Cassidy na un forma rapido a cera amistad na e scol. Esey ta debi cu e teenager tin un aura briyante, positivo, y semper ta contento y tin un gran humildad cune. Nan ta haya cu nan a perde un mucha muher remarcable como studiante. Riba e potret por mira Cassidy, y tambe e scol di dje na Massachusetts.
Na famia di e fayecida, DIARIO ta keda expresa palabranan di condolencia.
