Persecucion Mericano di exponentenan Hugo Chavez ta continua --- *Hopi confusion den region di Caribe den tension mundial di guera --- *Argentina lo a duna orden pa detene Diosdado Cabello pa Merca
ORANJESTAD (AAN) — E Presidente Mericano, Joe Biden, a comete un eror sumamente grave na momento cu decision a wordo tuma pa manda un delegacion oficial di Merca pa papia cu Gobierno di Venezuela.
Manera DIARIO ya a trece dilanti, e hecho cu Nicolas Maduro a duna libertad na dos gerente di Citgo cu for di 2017 el a detene hunto cu Nelson Martinez, tabata resultado di un bishita di un delegacion oficial di Presidente Mericano Joe Biden na Venezuela.
DIARIO ta sigui den contacto cu informantenan internacional riba e materia, cu a causa hopi confusion den region di Caribe especialmente pero tambe rond mundo, incluyendo Merca.
Informacionnan completamente eroneo a wordo publica segun informantenan a indica na DIARIO. Por ehemplo, a menciona e hecho cu Merca lo kier a cumpra 400 Mil bari di petroleo di Venezuela, mientras realidad ta, cu Venezuela ta bisa cu e por a bende 400 Mil bari di petroleo riba mercado internacional, si Biden a deshaci di e sancionnan riba Nicolas Maduro.
Na nivel internacional tabata tin rechazo pa e bishita di un enviado di Joe Biden pa Venezuela, cu ta afecta e imagen di gobernacion di Merca, manera informantenan clave a splica.
E pregunta grandi ta con un representante di Presidente Mericano por papia di eleccion na Venezuela cu como candidato Nicolas Maduro, cu ainda ta wordo busca como criminal dor di Merca.
E informacion aki cu DIARIO a presenta na inicio di siman pasa, a haya mas peso den e fin di siman na momento cu informacionnan a drenta cu Gobierno di Argentina a duna orden pa detene Diosdado Cabello si e mester trata na drenta Argentina manera supuestamente e tabata planea dia 10 di Maart.
Manera ta conoci Diosdado Cabello ta wordo considera e dirigente number 2 di Chavismo.
E ta wordo busca dor di Husticia na Merca, manera lo a keda confirma dor di Gobierno di Argentina cu kier a detene Diosdado Cabello pa cumpli cu peticion di Merca.
E intencion pa detene Diosdado Cabello na Argentina pues tabata pa entrega e dirigente Chavista na Merca, caminda e tambe ta wordo acusa di negoshi den droga y labamento di placa entre otro.
Informacionnan cu a alcansa DIARIO tambe ta, cu Nicolas Maduro kier a cuminsa negocia liberacion di Alex Saab, kende a nace na Colombia pero ta wordo acusa di ta envolvi den un plan enorme di estafa cu cuminda cu e regimen Chavista.
Alex Saab a wordo detene ora e kier a biaha di Iran pa Venezuela y te ainda ta den prison na Merca, caminda e lo a haci declaracionnan importante contra regimen Chavista.
Mientrastanto ya Venezuela a bolbe confirma cu e ta sostene Rusia y Nicolas Maduro a papia di Rusia como victima di Merca, e imagen cu Rusia kier mantene.
Manera DIARIO a relata siman pasa, region di Caribe y Aruba sigur mester vigila Venezuela, cu tin ekipo militar di Rusia y un ehercito cu a wordo getrain dor di Cuba, cu un presencia mas cu visibel den asuntonan militar di Venezuela.
