Director Interino Josmar Maduro-Sneek:
- Ta invita pueblo, principalmente di San Nicolas, pa haci uso di dje
ORANJESTAD (AAN) – E Director Interino di Biblioteca Nacional, señora Josmar Maduro-Sneek, den entrevista cu Matutino DIARIO a elabora tocante e nomber cu e sala nobo di actividad di e sede na San Nicolas a haya, y cu ta e nomber di e piedra precioso Esmeralda.
Señora Maduro Sneek a comenta cu Biblioteca tin e custumber di pone nomber di piedra precioso, y na Playa, manera ta conoci, tin e Sala Diamante, aña pasa a habri Sala Safiro, y aworaki ta ocasion pa e Biblioteca di San Nicolas tin un Sala Esmeralda.
“Nos ta hopi contento y orguyoso, full e crew na San Nicolas, a mi como director interino, di anuncia cu awe nos ta habri e sala di actividad nobo, cu ta wordo hopi uza. E sala aki ta wordo uza, por ehemplo, pa exposicionnan, tayer di trabao, charla y diferente evento. E siman cu ta bin nos a cuminza, Diadomingo, cu e Festival di Buki pa Mucha, y e sala a wordo habri oficialmente”, Josmar Maduro-Sneek a bisa. El a gradici na tur cu a yuda pa yega asina leu, cu tabata presente. Nan no ta cla cu e parti ariba ainda, pasobra nan ta ocupa cu remodelacion, pero ora e keda completamente cla e lo invita prensa, kizas aki un of dos siman.
Josmar a indica cu ta importante pa registra ora e sala ta wordo pidi pa algun actividad, p’asina tur cos bay ordena y cu tur material necesario ta ubica na tempo.
El a señala cu mester promove e sala Esmeralda pa bin cu mas actividad, pasobra hopi biaha nan ta haya comentario cu Biblioteca na San Nicolas no ta activo manera esun na Playa.
“Loke ta pasa ta cu nos tin tiki personal y esey ta un di e motibonan pakico nos servicionan ta remodelando tambe, p’asina por bin mas personal y haci mas actividad. Dificil pa un persona haci tur cos, pasobra e no por ta tur caminda”, Josmar Maduro-Sneek a menciona, y alavez a haci un invitacion na henter pueblo, principalmente di San Nicolas, pa bin haci uso di e sala cu ta nobo, pero e servicio ta siguiendo, pues Biblioteca San Nicolas no ta cera.
