Nutricionista di IBiSA Iraida Thijzen:
*Nada aconsehabel pa hubentud
ORANJESTAD (AAN) — Nutricionista Iraida Thijzen, di IBiSA, a toca e tema di bebidanan energetico bao e hubentud, den entrevista cu DIARIO.
Thijzen a menciona cu e mes como nutricionista di IBiSA, no ta acerca hopi e scolnan, pero si su coleganan cu ta atende cu actividadnan y deporte.
E nutricionistanan no tin un maneho riba esey, no obstante e ta haya cu nan mester wak esaki na un manera un tiki mas profundo. “Pero den nos beleid semper nos ta recomenda awa pa bebe hasta den ora di deporte. Awa ta e miho producto pa kita e sed y pa haya bek e likido cu nos ta perde door di sudor. Pero mi ta kere cu esnan cu mas nos tin cu informa ta e mayornan, cu hopi biaha ta cumpra esaki pa e muchanan of ta duna nan placa tambe”, Iraida Thijzen a indica.
El a agrega cu si e muchanan ta teenager y mayornan ta dun'e zakgeld, ta bon pa papia y splica nan kico nan por cumpra cu e placa ey. E tin entendi cu e bebidanan energetico ta caro, y nan por scoge na luga di esaki juice natural. Aunke juice tambe tin sucu, banda di esey tin hopi vitamina, cu e muchanan aki mester ainda pa crece.
“Mayornan mester ta conciente, busca informacion na prome lugar. Concientiza nan yiunan cu nan ta menor di edad ainda, pa haci miho escogencianan”, Iraida Thijzen a remarca.
El a subraya cu un combinacion di bebida energetico cu alcohol ta algo hopi fastioso. “Pasobra e combinacion di e bebidanan aki cu alcohol ta hisa e presion arterial, y e por haci e hoben, hopi malo. Pues ta bon pa no combina e bebidanan aki cu alcohol y menos si ta den edad bao di 18 aña, cu e hoben no mag di mishi cu alcohol ainda”, Iraida a señala.
“Atrobe, mi ta wak na e mayornan pa educa nan yiunan, papia cu nan over di e peligro di esaki, y no ta solamente pa haci fastioso sino pa cuida nan, pa cuida nan salud, y claro cu nan mester di energia, pero energia nan ta saca di un cuminda saludable. E bebidanan energetico aki berdad ta duna energia pa un rato y despues e persona ta cay den un bashi atrobe. Pero si e come saludable, come su pan bruin cu beleg, bebe lechi, come fruta y berdura, e energia ta dura mas largo y mas compatible cu bo insulin. Insulin ta subi y baha, pero si bebe bebida energetico e insulin ta bay te dak y despues ta cay te vloer, pero cu cuminda saludable e ta balansa y poco, poco. E ta subi menos lihe y e ta wanta bo mas largo”, E nutricionista Iraida Thijzen a bisa pa conclui.
