ORANJESTAD (AAN): Entre 9 pa 18 di Mei ta tumando lugar un evento cu cual ta spera di activa tur amante, conocedo y interesado di poesia riba nos isla.
E Aruba International Poetry Encounter ta un proyecto cu Maria Silva-Hart di Basha Foundation hunto cu e poeta Aru-argentino Arturo Desimone ta organisando pa prome biaha.
Esaki Silva Hart a indica durante un conferencia di prensa Diamars mainta.
El a splica cu e actividad ta consisti di oportunidad pa conoce poeta for di diferente pais Latino Americano, Europeo y di Caribe, mescos cu tayer di skirbimento, recital y otro actividad.
Den total ta yegando Aruba poeta di dies diferente pais, incluyendo Brazil, Escocia, Mexico, Puerto Rico y Venezuela. E prome evento a cuminza riba 9 di Mei y tabata na e patio di Museo Arqueologico na Rancho, mientras cu awe tambe lo tin e mesun evento na e mesun luga, pero den e espacio cu tin parti dilanti di e monumento aki den Schelpstraat.
Den e dianan despues tin diferente actividad manera workshop na scolnan secundario, EPI, Biblioteca Nacional diahuebs 11 di Mei y na Universidad di Aruba dianan 15 y 16 di Mei. Tambe Silva Hart a remarca cu tur actividad ta habri pa publico y no tin mester di registra pa atende.
