ORANJESTAD (AAN): Awe Dialuna mainta pa 7:00 am, tabata poni riba schedule pa e crusero Norwegian Getaway drenta Waf di Aruba.
Esey sinembargo lo no socede, debi cu e compania di Norwegian Cruise Line a dicidi pa cancela viahe di 8 di su barconan.
Y e barco di Norwegian Getaway ta uno di nan! E barco aki cu capacidad di entre 3.900 pa 4.800 pasahero riba Diadomingo atardi tabata yegando Port of Miami.
Norwegian a cancela viahe di ocho crusero (casi mitar di su flota), despues cu nan barco Norwegian Pearl a regresa Diaranson siman pasa hopi trempan bek pa Miami, debi na un brote di Covid-19 cu a plama entre e tripulacion.
Esaki a bira e prome cancelacion grandi di crusero di parti un compania, desde e comienzo di pandemia di Coronavirus na Maart 2020, ora cu e cruseronan a stop abruptamente y no a opera mas pa hopi luna largo.
Norwegian a bisa cu e barconan Norwegian Gateway, Norwegian Sky, Norwegian Pride of America, Norwegian Jade, Norwegian Star, Norwegian Sun, y Norwegian Spirit lo djis stop di nabega pa loke a resta di Januari, mientras cu e otronan lo suspende nan viahenan te cu final di April. Norwegian cu sede na Miami, ta e di tercer compania mas grandi di mundo y tin 17 barco.
Tur pasahero cu a reserva, lo ricibi nan placa bek completo, y un voucher pa un futuro viahe.
Tabata Diaranson 5 di Januari 2022 cu e barco Norwegian Getaway mester a sali pa bishita Bahamas, Aruba, Curacao, Bonaire, y Puerto Plata riba un viahe di 9-dia. Pero e mesun dia a dicidi cancela e viahe aki debi na “circunstancia relaciona cu Covid-19”. Tin algun experto cu ta pensa cu djis pasobra recien e islanan di Aruba, Bonaire, y Curacao a nenga di tuma barco, cu esey kizas lo por ta loke a impulsa e cancelacion aki.
Sinembargo pa Diamars 11 di Januari 2022, e barco ‘Norwegian Epic’ ta poni riba schedule pa bishita Aruba pa 7:00 am, y keda te 8:00 pm. Pues esaki ya ta contradeci e teoria ey.
Otro cruseronan tambe: Cancelacionnan ta bin awor cu mas y mas crusero ta wordo afecta door di e variante Omicron di Coronavirus cu ta bariendo rond mundo.
Na Italia mes, un total di 45 pasahero cu a test positivo pa Covid-19, a baha di e barco MSC Grandiosa na e waf di Genoa riba Dialuna siman pasa, prome cu e barco a sigui cu su viahe cu e resto di hendenan cu ta saludable keto bay.
