ORANJESTAD (AAN) – Parlamentario Shailiny Tromp-Lee, di fraccion di MEP, a señala den conferencia di prensa Diaranzon, cu Aruba ta den un situacion hopi tenso na e momentonan aki.
El a expresa cu e ta compronde e lucha pa haya e 12.6% bek, pa loke ta trata salario di empleadonan publico, unda cu hendenan ta subiendo riba caya. No obstante, Tromp-Lee kier urgi e lidernan sindical pa sinta na mesa cu ta unda ta soluciona problema, y busca un solucion berdadero pa e empleadonan cu nan ta representa.
El a bisa cu si no sinta na mesa lo no yega ningun caminda. Subiendo riba caya, manifestando, yegando te na Parlamento sin entrega un manifiesto, sin cu enberdad a duna espacio na Presidente di Parlamento pa papia cu e grupo, y scucha berdaderamente, asina no ta yega ningun caminda.
Shailiny Tromp-Lee ta haya cu gobierno ta mustrando di su parti. E ta yamando lidernan sindical pa sinta na mesa, ta dispuesto pa habri bukinan; ta dispuesto pa laga representantenan di sindicato sinta cu representantenan di gobierno riba nivel, manera esnan cu tin informacion. “Ban tuma e espacio aki, ban haci bon uso di dje. E meta ta, nos tur kier mas placa den nos cartera; no mester lubida cu nos, Parlamento, y e otro politiconan cu ta gobierno, tambe a entrega 25%. Lo sona hopi alentador si duna ambtenaarnan bek nan 12.6%, nos tambe kier haya nos 25% bek, pero e ta husto pa e pais aki? E ta husto pa hinca nos pais den un situacion na unda cu Hulanda ta bisa Aruba cu no ta cumpliendo cu e condicionnan y cu no tin placa mas, y nos tur sa cu gobierno a bin ta indicando cu te cu e dos cuartal di 2022 nos ta bay ta dependiente di e sosten di likidez di Hulanda”, e parlamentario a remarca.
Tromp-Lee ta pidi pa bay tene e cabesnan frio. Pueblo ta drentando un temporada crucial y hopi importante pa Aruba, cu ta e temporada halto. E parlamentario a indica cu el a ripara esaki na e cifranan di yegada di avion, y ya caba pronosticonan di Departamento di Economia, pa loke ta e resultado di crecemento economico pa gobierno, ta hopi positivo. Segun e parlamentario mitad di e resultado aki pa e bira realidad ta den man di comunidad, basa riba tres actitud: 1. Comporta y mantene cada un na e reglanan basico di higiene. 2. Sea sensato y no crea disturbio, cu ta pinta Aruba negativamente, cu hendenan ta bisa cu awo no ta e momento pa bin nan pais. 3. Ban uza e temporada nos dilanti cu ta e temporada di Pasco, cu cifranan alentador riba mesa, ban enfoca riba speranza pasobra e cifranan pa 2022 pa loke ta concerni recuperacion di nos turismo tey pa bira berdad.
“Ban traha hunto, ban para pa loke enberdad ta importante pa nos pais na e momentonan aki, y cu nos tur ta wak nos cartera ami no tin duda. Ami tambe ta haci esey. Pero ban pone e biaha aki, Aruba na prome lugar!”
