Prijs halto di hospital den pandemia y crisis mundial inespera --- *Cuido medico mara na e prijs di progreso medico y inflacion --- *Na forma directo of indirecto peso AZV pa Pueblo lo sigui crece
ORANJESTAD (AAN) — E problemanan cu Aruba tin actualmente cu AZV, no a nace di e pandemia Covid-19 y no por wordo coregi a base di un momento den historia di Aruba.
Awe e problema di AZV ta explota den un situacion economico y financiero mundial, cu ta afecta tur prijs di remedi, tur prijs di ekipo y material cu mester pa cuido medico di tire pa e ambulance, pa e coriente pa oficina di dokter, pa prijs cu hospital mester paga pa habon y asina por sigui.
AZV ta basa riba un pensamento politico, a wordo introduci pa motibo politico y awe ta habri porta pa politica hunga cu salud di Pueblo.
E problema mas serio cu Aruba conoce y cu mester haya un solucion, ta e problema di AZV, cu ta mishi directamente cu Salud di Pueblo cu den un constelacion democratico ta central pa calidad di bida di un ciudadano.
Segun democracia tambe, un ciudadano ta liber pa dicidi riba e calidad di bida cu e kier y estado (gobierno) mester percura pa e grupo di comunidad cu ta incapaz pa produci un base social (cu ta inclui su salud) pa su mes a base di solidaridad.
Responsabilidad ta un factor determinante den un gobernacion democratico y, manera na varios ocasion DIARIO a trece dilanti, Pueblo no a wordo bon prepara pa e responsabilidad financiero di AZV cuna su introduccion a wordo presenta como un maraviya.
Informacion experto cu DIARIO ta bolbe ricibi ta indica, cu e peso di AZV lo sigui crece pa Pueblo na un forma directo y indirecto a base di diferente aspecto cu tabata existi pero tambe aspectonan cu no por a mira adelanta.
AZV a wordo introduci na final di Siglo 20, cu tabata e siglo cu a conoce un revolucion cientifico cu sigur tabata visibel den Cuido Medico, e ala di Salud Publico directamente encarga cu cuido di e salud di cada ciudadano.
E desaroyonan den cuido medico a sigui tras otro y a nifica introduccion di tratamentonan avansa cu metodonan y ekipo cu ta costa placa.
A wordo mustra riba e ekipo cu practicantenan di mundo medico mester pa haci nan trabou.
E hecho cu hende a alarga su bida a haci cu e cantidad di aña cu un hende ta exigi atencion medico a aumenta mientras cu mas halto edad di un ser humano yega, mas placa mester pa su tratamento.
Cu crecemento di poblacion y crecemento den posibilidad pa atende enfermedad, e costo di cuido medico ta sigui subi.
For di momento cu a introduci e concepto politico di AZV den un mundo cientifico di Salud Publico, no mester tabata e factor politico cu a domina pero e factor cientifico na tur nivel den un mundo.
Expertonan den administracion y maneho di Salud Publico mester a hunga e papel principal den e introduccion di AZV, cu mester a reemplasa otro sistemanan cu e pais tabata conoce pa trato medico.
DIARIO na e momentonan aki hunto cu expertonan ta compara cifranan pa cuido medico cu ta sigui subi pa motibo di avance medico pero tambe pa motibo di inflacion cu ta afecta tur parti di comunidad.
Na Aruba cuido medico ta completamente centralisa den AZV cu mester percura pa gasto di ambulance te e gasto di Intensive Care den un hospital, cu a conoce gastonan enorme pa reconstruccion cu no a tene na consideracion situacionnan manera e pandemia pero tambe e crisis actual, cu ta aumenta tur prijs.
AZV tin dos salida segun expertonan cu a mustra cu AZV na forma directo of indirecto ta un responsabilidad pa Pueblo. Si no aumenta e prima, mester busca otro forma pa aumento di entrada di e seguro medico nacional, na cual tur habitante di Aruba mester ta afilia segun ley.
For di momento cu AZV a bira realidad na Aruba e factor politico a domina y ta sigui domina te awe cu gastonan medico ta sigui subi hunto cu tur gasto na nivel internacional na un mundo den un situacion financiero y social sumamente serio.
