Minister Arthur Dowers a señala:
- Ora di uza parkeo pero bo a keda sin paga
ORANJESTAD (AAN) Den conferencia di prensa, Minister di Husticia mr. Arthur Dowers, a haci un declaracion tocante Aruparking, cu ta vigente ainda, y gobierno ta haciendo adaptacion di ley pa haci mas facil e cobranza di boet.
E mandatario a bisa cu t’asina aki cu Aruparking, te na e momentonan aki, tin e posibilidad di claim auto y despues di esey takel esaki. Pero e dignatario no sa si ainda tin clampmento di auto. “Sinembargo, ta importante pa tin esaki na cuenta, pasobra e posibilidad ta keda cu Aruparking por takel ora ta constata cu bo a para bo auto cierto cantidad di auto den un lugar unda tin cu paga, pero no a paga.
E simannan cu ta bin mi ta spera cu tur hende a tuma bon nota di esaki, pa no keda sorprendi si na momento cu bo a laga bo auto mas cu dos ora den un parkeerplaats cu bo mester paga p’e, cu Aruparking a laga takel esaki, anto e costonan ta bin pa bo cuenta”, e dignatario a subraya. Esaki pasobra esey ta regla den ley na e momentonan aki, cu esey ta posibel.
“Loke nos ta haciendo adicional tambe, aworaki ta haci adaptacion den e ley di Aruparking, pa nos mira con pa yega na un forma mas facil di cobra boet na momento cu tin hende ta bay para den e areanan aki sin paga”, Minister Dowers a reitera.
El a agrega cu tur hende sa cu si bo no paga e boet na dado momento esaki ta bay wordo cobra door di autoridad di gobierno, y hasta tin hende ta wordo tuma den bewaring tambe, si nan no cumpli.
“Pues, mi ta haci un apelacion y lo bin mas informacion den prensa e dianan nos dilanti, pa loke ta e parkeer den centro di ciudad, unda si bo haci uso di e lugarnan destina pa paga bo tin cu paga p’e y so bo haci uso, por ehemplo, di abono bo por para mas caminda” Minister Dowers a splica.
