Silent auction awenochi di Methodist Church di Aruba --- ORANJESTAD (AAN): Awe Diasabra 11 di December, lo tin un Subasta pa recauda fondo pa Methodist Church Aruba y Meals on Wheels.
Nan prome Subasta lo ta un ‘silent auction’, di 6:00 pm te cu 8:30 pm na Graf von Zinzendorf School na Bernhardstraat 259 na San Nicolas.
E meta di e subasta ta pa recauda fondo pa proyectonan social y proyectonan comunitario cristian particularmente Meals on Wheels.
E subasta ta un subasta silencioso (caminda ta mustra interes pa un mercancia riba papel) y tambe ta bay tin diferente snack boxes y cuminda tipico di diferente parti di Caribe na benta. Tin paña, regalo y decoracion di Pasco, arte y “gift certificates” di diferente comerciante y restaurant local.
Den e subasta ta bay tin mercancia pa tur cartera, pa grandi y chikito. E mercancia mayor di e subasta ta un jersey di Xander Bogaerts (#2) firma pa tur hungador di Boston Red Sox (cu a usa den torneo di MLB 2021) den un frame. Otro ehemplo ta gift certificates di Dr. Walker pa tratamento di problema cu roncamento y/o beugel.
E evento ta den cura di Graf von Zinzendorf School y e subasta mes lo ta den gymzaal di e scol. Den un subasta silencioso ta mustra interes pa un mercancia door di skirbi e contribucion cu ta desea di haci riba un papel (asina yama “bid card”). Tanten cu e subasta no sera otronan tambe por indica (atrobe via papel) cu ta desea di contribui cu un suma mas halto pa e mesun mercancia.
Durante e subasta (cu lo ta di 6.00 pa 8.00 p.m.) y despues cu ta haci e administracion final (te 8.30 di anochi) lo tin entretenimento di entre otro steelpan di Nico Connor y e grupo di baile di Methodist Church na playa. Lady DJ tambe lo tey pa trece ambiente di pasco. E mercado di cuminda ta bay tin entre otro snack boxes cu snacks frieu of cayente, ayaca, “saoto soep”, pisca y arroz cu bonchi, curry chicken, bolo y mucho mas.
Ta invita henter pueblo di Aruba pa pasa na Graf von Zinzendorf School na Bernhardstraat 259 na San Nicolas di 6:00 pm pa 8:30 pm di anochi pa contribui cu Meals on Wheels cu ta duna 80 famia cuminda cayente 2 biaha pa siman. Aruba Methodist Church ta existi pa mas cu 80 aña na Aruba y ta conta cu bo ayudo pa por keda yuda esnan vunerable den momento di necesidad.
Ta gradici tur hende di antemano cu ta contribui y cu lo haci e prome subasta uno exitoso. Y danki tambe masha grandi na tur cu a duna mercancia pa e subasta.
