Lenny van Geervliet, Coordinador:
ORANJESTAD (AAN) – Transporte publico ta problematico pa e adulto mayor. Asina señora Lenny van Geervliet, Coordinador di Proyecto 125 a sigui bisa durante un entrevista, den cual tambe el a haci un invitacion na personanan cu lo kier bira boluntario pa e liña 125, pa un mainta informativo.
Tin adulto mayor cu ta bisa cu su yiu ta hibe, supermarket, por ehemplo, pero yiu tambe ta druk y tur cos ta bay poco, poco.
Bay supermarket ta tuma mas tempo pa e adulto mayor. “E ta tuma su tempo y mi ta kere cu nos tin e derecho di tuma nos tempo y mi ta kere cu nos mester haci esey posible”, van Geervliet a expresa.
Señora van Geervliet ta kere cu a base di e registracion cu e linea 125 ta haci, aki un aña nan tin un miho bista riba e proyectonan cu mester sigui: “proyectonan di transporte, un central pa boluntario unda por haci otro servicio, e lo ta hopi bon” e dama a bisa.
Mainta di Informacion: Señora Lenny van Geervliet ta bay tin un mainta di informacion na Centro Kibrahacha, cu ta e cas di 125, awe mainta 10’or. E prome paso pa esnan interesa, ta asisti na e mainta informativo aki, pa asina wak si e tipo di trabao aki, ta atrae bo.
Ta bay tin un formulario cu e persona tin cu yena, y a base di e formulario aki ta haci un combersacion cu e interesado. Tambe, den e parti aki, e screening tin un proceso chikito. Fuera di esey, durante e training mes ta bay tin hopi situacion di practica cu lo bay test cu den carera di esaki, na ambos banda, e persona por wak si ta algo p’e of no.
