ORANJESTAD (AAN): Awe Diahuebs anochi, e facultad di Hospitality and Tourism Management Studies (FHTMS) di Universidad di Aruba, lo tene un Anochi di Informacion encuanto nan programa pa educacion di Master’s.
Benedicta Deogratias, kende ta un docente na Facultad di Ley a confirma esey den un entrevista cu DIARIO. El a splica cu e anochi ta for di 6:30 pm te cu 8:00 pm, na Universidad di Aruba mes.
Lo duna informacion di MBA di FHTMS, tambe MSc SISSTEM, tambe di MA Law, y di MA Governance & Leadership.
E facultad aki tin dos programa, esta uno di Bachelor’s y tambe awor presentando e programa di MBA. Awe tin e anochi di Open House cu informacion di e MA Law.
E idea ta pa invita tur hende interesa di continua nan Master’s, y den e mesun invitacion aki e ta bay pa esnan trahando den diferente sector cu kier sigui cu e desaroyo di nan carera.
Pa e estudio di MBA, bo mester tin un Bachelor’s Degree y bo mester tin por lo menos dos aña di experiencia, y esey ta importante! Pues no ta djis un Bachelor’s Degree cu a caba di sali di Universidad, pero e parti di experiencia tambe ta importante, hunto cu e motivation letter.
Facultad di Ley tin tres profil, esta e prome ta “Arubaans Recht” cu ta wordo duna full na idioma Hulandes. Tambe tin “International Law Regulation and Governance” y esaki ta wordo duna na Ingles. E di tres programa ta ‘Fiscaal Recht’ cu ta ley di belasting, y esaki ta ser duna na Ingles como tambe Hulandes.
Na Aruba ta notando cu hopi hende cu ya ta den mundo profesional, ta busca pa sigui e estudio di Fiscaal Recht pa asina nan por haya mas background riba ley di impuesto.
Nan programa di Master’s pa “Legal Practice” ta hopi popular cerca undergraduates y tambe cerca profesionalnan di pafo, y tambe e programa di International Law.
Deogratias a enfatiza cu nan programanan ta tanto Full-Time como tambe Part-Time. Pakico tin hende ta escoge pa Part-Time? Esey ta pa hendenan cu tin un trabao, of kier goza di nan bida familiar cu un estudio. E estudio di Full-Time ta uno cu ta dura 1 aña, y esun di Part-Time ta di 2 aña.
Durante e Anochi di Informacion, publico por haya tur informacion riba e estudionan cu nan ta interesa pa sigui na Universidad di Aruba.
