Adultonan tambe por bay vacuna! - ORANJESTAD (AAN): Diabierna mainta a tuma lugar un conferencia di prensa na Centro Libertador Betico Croes, relaciona cu e asina yama Vacunathon Youth Edition cu ta tuma lugar awe na Centro Libertador.
Segun Jurette Croes di DVG, siman pasa Aruba a haya e autorizacion di Hulanda pa vacuna tambe e muchanan di 12 aña bay ariba.
“Mester bisa cu esaki a haya un acogida hopi grandi, unda cu den un siman di tempo ya caba nos a vacuna 732 mucha menor di 18 aña”.
Bo ta wak cu mayornan tabata en espera di e oportunidad aki, pa por proteha nan yiunan tambe, segun Croes.
El a sigui bisa cu ta hopi importante pa vacuna e muchanan, mirando e diferente variantenan cu ta afectando e muchanan tambe.
Aworaki ta temporada di vakantie y varios hende ta viaha cu nan yiunan, pues pesey tambe ta importante pa nan ta vacuna y proteha.
Croes a splica cu apesar di e hecho cu e Vacunathon ta enfoca riba e muchanan menor di edad, e posibilidad tey pa adultonan tambe presenta pa wordo vacuna.
“Mayor y yiunan por presenta pa vacuna hunto si nan ta desea”.
E Vacunathon ta bay ta di 9’or di mainta te cu 4’or di atardi, unicamente na Centro Libertador Betico Croes, segun Croes.
El a pidi tur hende pa bin cu nan carchi di AZV y si e mayor tin e Health App caba, pa nan agrega e mucha den e App y traha un profile pe y ‘request’ e vacuna.
“Na momento cu bo yega akinan, e ta haci bo proceso administrativo mas cortico”.
Sinembargo, si e mayor no tin acceso na internet of e Health App no ta problema.
Djis yega cerca nos y nos lo haci e registracion, segun Croes.
El a splica cu muchanan cu ta yiunan di hende sin documento tambe lo wordo vacuna.
E mayor mester bin cu paspoort di e mucha y mustra riba e hecho cu e mucha tin hopi tempo na Aruba, pa asina e haya su vacuna.
Croes a indica cu studiantenan di Aruba cu ta cu vakantie riba nos isla y ta bay keda pa mas cu 1 luna, tambe por haya nan vacuna.
“Ta hopi importante pa nan haya tur dos vacuna prome cu nan bay bek studia”.
Mester tene cuenta cu e hecho cu entre e prome y e di dos vacuna mester tin 3 siman, segun e Croes.
El a splica tambe cu actualmente tin 68.796 persona ya caba vacuna na Aruba y esaki ta representa 69% di e personanan di 18 aña pariba.
Pa loke ta e personanan di 12 pa 100 aña nos grado di proteccion na Aruba actualmente ta di 64%.
“Nos tin ainda un average di 4 caso nobo di contagio pa dia y e tur hende ta recuperando, unda cu no tin un situacion caotico por ehempel na hospital”.
Sinembargo, e virus tey y ta sigui transmiti su mes, segun Croes.
