WILLEMSTAD: Prome Minister Gilmar Pisas di Curaçao a anuncia cu awe Dialuna 8 di mei 2023 e isla lo ricibi e prome 2 barconan chikito di fruta y berdura for di Venezuela.
Esaki ta den cuadro di e reapertura di frontera maritimo dia 3 di April. Lo yega mas despues un di tres barco chikito ora cu tur e papeleonan necesario ta cla.
Despues di mas cu 4 aña nan lo ricibi bek e barconan di fruta, berdura y pisca, y lo ricibi tambe pronto e barconan di por mayor (groothandel).
E proceso a tuma su tempo pa por a regula tur loke tabata necesario pa por a cuminza habri e frontera maritimo den fase y di un forma controla. Lo keda vigila con e proceso ta cana y caminda tin di ahusta y of haci cambio lo considera esaki.
E barconan lo cuminza drenta Haf di Curaçao, bao di guia di Warda Costa, pa mas o menos 7.30‘or di mainta. Lo bay tin un ceremonia pa ricibi e barconan aki na Koningin Wilhelmina Brug: ‘Brug na Scalo’ na e parti di Punda.
