Natalie Geerman, directora, ta duna di conoce:
ORANJESTAD (AAN) – Director di Avond-Onderwijs Aruba, Natalie Geerman, den entrevista cu DIARIO a menciona cu nan inscripcion pa e siguiente aña escolar (2024-2025) tabata cera oficialmente.
Pero door cu tabata tin hopi diploma cu a yega laat, entre otro aspecto, nan extende e inscripcion te awe, dia 17di Juli 2024.
Inscripcion ta tuma lugar online, y locual e persona mester ta e papel di censo, su raport, diploma, prueba di pago schoolgeld. Señora Geerman a splica cu e aña aki a baha e schoolgeld pa coopera cu e alumno, y ta pidi pa paga di un solo bez. E costo ta 250 florin pa leer 2 cu 3 y 300 florin pa examen klas. Esaki ta inclui examen geld.
Señora Geerman a indica cu scol tin suficiente espacio. Tin dos localidad, un na Playa unda ta haci uso di e edificio di Colegio EPI y na San Nicolas na Colegio Nigel Matthew tin un filial. Y di tres, Mavo online. Aki e alumno no ta presente fisicamente, solamente pa e testnan.
Geerman a comenta cu e grupo di mas grandi ta bin na Playa, y e grupo mas chikito na e filial na San Nicolas, y esun online ta mas of menos pareu cu San Nicolas.
“Nos ta apela na tur alumno, si bo tin e soño di logra bo diploma, esaki ta bo chens, no warda, nos tey pa yuda bo, nos tin e coachnan cu tambe ta yuda e alumnonan pa logra. Bay online, riba nos website ww.avondmavo.aruba.com y bay cu tur e rekisitonan cu bo mester. Tuma e chens y inscribi, bay pa e challenge!”, Natalie Geerman a señala.
Finalmente, señora Geerman a comenta cu e Idioma Hulandes ta birando un reto pa nos Arubianonan, y pa tur alumno cu ta biniendo scol. “E realidad t’asina y loke nos ta wak hopi biaha den klas, den practica, ta cu e docente ta switch pa Papiamento, pa splica un rato pa e alumno compronde y despues bolbe switch na Hulandes, na unda cu nos examennan ta keda na Hulandes, ta toch un parti cu nos tin cu keda deal cu ne.
