Parehanan hoben ta confronta un futuro sumamente dificil
*Falta di vivienda ta stroba desaroyo social di mucha y hoben
*Benta di e dak riba cabez di un pober ta un crimen grandi
ORANJESTAD(AAN)—Cuanto mucha y hoben a bira victima di e situacion cu segun Husticia na Aruba, a wordo crea dor di Benny Sevinger y e grupo privilegia cu lo a ricibi tereno a cambio di placa?
Uno di e hopi preguntanan cu ta bini dilanti ora atende cu e caso Avestruz, cu ta mucho mas cu entrega di tereno contra regla como fabor politico.
Central den e sentimentonan cu e scandal aki a provoca den poblacion, ta e realidad kico falta di bon vivienda a nifica pa famianan pero tambe pa hopi mucha y hoben, cu a wordo condena na viviendanan cu a stroba nan bon desaroyo.
E punto central den e caso aki ta keda, cu e siguransa cu democracia ta crea pa un poblacion cu no por conoce discriminacion, ta wordo completamente y cu inhusticia grandi a wordo comete contra hobennan.
Resultadonan na school y tur comportacion di hobennan, ta wordo dicidi pa un gran parti dor di nan condicionnan di bida diario, den cual nan vivienda ta hunga un papel sumamente importante.
Na Aruba tin hopi caso di mayornan, cu durante añanan largo a keda riba lista di espera pa un tereno di Gobierno pa nan por construi nan cas.
Mayornan hoben, cu mester di un bon vivienda pa sigura cu nan yiunan ta crece den un ambiente cu no ta pone nan futuro na peliger.
Democracia ta Polis di bienestar di un comunidad y sigur di e grupo cu menos defensa social y financiero y cu ta cualifica pa tur atencion, ora nan ta haci peticion pa un tereno pa asina nan por construi nan cas.
Ora papia cu mayornan hoben y e placa cu nan tin disponibel, ta bini dilanti cu nan ta capaz pa sigura cu nan yiunan ta crece den nan cas propio, caminda nan no ta mara na paga huur pero directamente ta paga e gastonan pa nan por tin nan propio vivienda.
Informacionnan cu ta nace den Pueblo ariba e scandal di tereno, ta indica cu Benny Sevinger lo mester tabata otorga tereno na hende financiamente capaz pa paga nan mes placa, na momento cu mayornan cu menos entrada, tabata por a traha un cas pa nan mes y nan yiunan si nan a haya tereno.
Cantidad di pareha cu kier a percura pa un ambiente social responsabel pa nan yiunan, a pidi tereno pero no a haya e base necesario pa asina nan por a construi nan cas y saca placa, cu nan tabata paga na huur, pa nan paga pa nan vivienda propio.
E posibilidad di un mucha pa drumi bon, pa traha su tareanan di school y desaroya su mes, ta haci e necesidad di un bon vivienda necesario.
Si acusacionnan den Corte ta berdad, Benny Sevinger tabata duna personanan cu por a cumpra nan propio tereno pa haci negoshi, preferencia riba famianan pober cu pa motibo di e prijs di tereno, no por a traha un vivienda pa nan famia.
E pregunta serio cu ta wordo lansa ta, con por ta posibel cu peticionnan di Arubianonan pa terenonan den barionan di Pueblo cu ni sikiera tabata encera e sumanan enorme di terenonan cu a wordo otorga na un grupo privilegia, nunca a haya atencion di Benny Sevinger, cu a yora den Corte pero a lubida e lagrimanan cu den tanto famia tabata visibel pa e condicionnan di bida cu falta di vivienda a crea pa mucha.
Tin casonan di hobennan cu no a haci uzo di oportunidadnan di bida debi na e condicionnan di bida den casnan cu nan mayornan por a paga den barionan hasta peligroso pasobra no por a construi un cas propio sin tereno di Gobierno.
“Si tur loke ta bini dilanti den sala di Corte ta berdad, Benny Sevinger tabata tin un maneho pa e Arubiano cu menos of ningun entrada, y otro maneho pa e Arubiano cu si por a pone placa riba mesa contra Ley,” a bini dilanti.
Si tur acusacion ta berdad, esaki ta nifica discriminacion, trato preferencial contra Ley y principionan di democracia, cu ta kibra futuro di e persona cu no por paga placa na forma ilegal pa haya tereno, mientras persona cu tin placa por haci uzo di e ley cu ta proteha na prome lugar e Pueblo pober, pa haya un tereno cu cual e por haci negoshi, a bini dilanti.
E caso Avestruz sigur a kibra e confiansa di Pueblo den e sistema politico, cu mester ta e Polis pa defende bienestar y futuro di Pueblo y sigur di hobennan cu ta perde nan oportunidad pa desaroya nan mes pa falta di e infrastructura cu entre otro ta contene asistencia cu tereno pa garantisa un vivienda adecuado na hende cu menos recurso.
