E modelonan ta mustra cu:
ORANJESTAD (AAN): Horcan Beryl recien a pasa impactando varios isla di Caribe, peninsula di Yucatán y Texas y costa di Merca.
Aruba no a sinti e impacto ni cu awacero pisa cu por a cay. Aworaki e actividad di e temporada di horcan den Atlantico ta den un pasa y e rason di esaki ta pasobra ta den un fase negativo (no faborabel) di OMJ (Oscilacion Madden Julian), cu ta aumenta aire descendente y, por lo tanto, ta trece mas estabilidad den Atlántico.
Otro consecuencia di esaki ta cu ta aumenta e cantidad di stof di Sahara y aire seco.
Sinembargo, parce cu e trankilidad aki ta bay cuminsa cambia den e siguiente simannan. Asina cu e fase negativo di OMJ ta bay y gradualmente bira mas positivo, por anticipa e desaroyo di e prome ciclon den Atlantico pa fin di juli.
Locual ta observa ta un onda tropical cu ta saliendo di Africa, cu por haya condicionnan mas faborabel (aire ascendente, disminucion di aire seco y stof) y esey lo dun'e chens pa desaroya.
E modelonan ta mustra cu luna di Augustus por bira un luna hopi activo den loke ta actividad di ciclonnan tropical. Hasta ta existi posibilidad cu lo mira multiple ciclonnan tropical na mesun momento den Atlantico.
Parce cu esaki lo ta e comienso di e periodo mas activo di e temporada di horcan manera cu ta acerca na e piek di e temporada di horcan 2024.
