Cambio repentino na Bureau Examen Rijbewijzen
ORANJESTAD (AAN): Manera cu DIARIO a trece dilanti Diahuebs siman pasa, e asociacion local di esnan cu ta duna les di Rijbewijs, a bati alarma relaciona cu cambionan inespera cu a worde introduci den proceso di pasa examen pa Rijbewijs na Aruba.
E maneho nobo aki ta uno drastico, caminda nan ta baha e inscripcion di 10 pa 5 hende so pa siman. Tambe ta bin cu exigencianan nobo, e.o. cu Rijschoolnan tin di yega cu e identificacion original di e cliente. Pues tin di bay pidi e cliente pa laga nan cu e cedula, paspoort of rijbewijs pa inscribi.
E motibonan pa e cambionan aki ta na prome lugar, falta di personal, di dos, pasobra algun di e agentenan ta bayendo opleiding. Pues ta keda un persona so pa deal cu tur e inscripcionnan pa henter e isla.
A base di tur esaki, riba Diabierna cu a pasa e Asociacion VRA di Rijschoolnan na Aruba a dirigi un carta pa Altocomisario di Cuerpo Policial pa duna nan opinion riba e cambionan aki.
Nan reaccion den carta: Aki DIARIO ta presenta e contenido di e carta cu a wordo manda pa Polis.
Miembronan di Asociacion V.R.A. a informa directiva cu den wandelgangen ta worde papia cu lo tin cambionan na caminda locual ta regarda reduccion pa inscripcion di candidatonan pa examenrijbewijs y si nos directiva ta al tanto di dicho cambionan. Nos contesta tabata negativo.
Pa nos sorpresa dia 24 di maart 2025, cu ta fecha cu ta reserva pa rijscholen por inscribi nan candidatonan, nos a worde informa cu un email, conteniendo un carta data 20 di maart 2025, a worde manda pa e rijscholen informando nan di e cambionan.
Mester remarca cu V.R.A , cu ta representa mayoria di e Rijscholen, cu ta un rechstpersoon por medio di Statuut y cu ta e gesprekspartner mas importante den e discusion aki, lamentablemente no a ricibi e email ya menciona.
Considerando cu e cambionan presenta tin consecuencia nan drastico y negativo pa nos clientela y pa nos miembronan, ariba iniciativa di nos directiva, a acerca sr. Edgar Maduro, cu recientemente a worde apunta como Coordinator Unit Examen Rijbewijzen, pa un reunion informativo.
Dia 25 di maart 2025 VRA e reuni informalmente cu sr Maduro. E reunion a bay den un bon ambiente y nos a intercambia ariba varios topico nan cu tin nos atencion y a propone pa sinta na mesa pa bin cu soluccionan structura y duradero.
Tocante e carta di dia 20 di maart 2025, V.R.A. a informa sr. Maduro cu nos tin objecion ariba ambos puntonan y cu nos lo consulta cu nos miembronan. Durante un reunion extraordinario di V.R.A. teni dia 27 di maart 2025 miembro nan presente a dicidi lo siguiente:
(*) Reduccion di 10 pa 5 kandidato pa rijschool:
B.E.R. su ponencia ta debi na scarcedad di personal. Den pasado na varios ocacion V.R.A. a mustra cu tin comprension pa esaki pero cu V.R.A. a sugeri pa introduci “Online inschrijving” cu lo elimina e problematico aki di inmediato y al mismo tiempo esun di identificacion valido. Dus twee vliegen in een klap.
Nos ta den aña 2025 y mester haci uso di tecnologia. Mas a un cu gobierno ta promoviendo E-Governance y cu tin fondo disponibel.
Censo ta dispone di e programma aki y a ofrece K.P.A. pa haci uso di dje. Censo a produci full e procesbeschrijving y KPA solamente mester a produci un “timeslot” pero pa motibonan desconosi esaki no a tuma lugar.
V.R.A. su ponencia ta cu no mester perde mas tempo valioso den e asunto aki. E wiel ta inventa caba y mester haak e knoop door. Mester trece K.P.A. y Censo hunto y soluciona e problematico aki a.s.a.p.
Miembro nan presente a dicidi di no ta bay di acuerdo cu e ponencianan poni den e carta di dia 20 di maart 2025 y ta urgi pa K.P.A. revoca esaki di inmediato.
V.R.A. como gesprekspartner ta pidi pa worde respeta y ta boga pa reanuda e combersacionnan pa asina discuti e puntonan pendiente. Miembronan ta pidi pa esaki tuma lugar no mas tarda cu 1 siman.
