Ronella Croes di ATA encuanto prome cuartal di 2026:
ORANJESTAD (AAN) CEO di ATA, señora Ronella Croes, den entrevista cu DIARIO a declara, cu otro asunto cu ta importante ta, cu pa loke ta trata e prome cuartal di aña 2026, pa loke ta High Season, Aruba tin tur componente na nan lugar, pa ta un temporada halto hopi fuerte.
“Aki mi ta papia di vuelonan adicional, vuelo inaugural cu nos a celebra siman pasa, dia 1 di Januari, cu ‘Aerolineas Argentinas’ cu su prome vuelo pa Aruba, pues no obstante cu bo tin un situacion cu a tuma lugar e fin di siman cu a pasa, mi ta kere cu mirando e hecho cu tin hendenan ta saliendo, y otronan cu ta drentando, cu ya caba tin nan reservacion, y mirando e hecho cu e fin di siman aki ta continua di ta fuerte, asina nos tin proyecta pa e resto di e cuartal, uno di aña 2026, mi ta spera cu nos por goza sigur, di un temporada halto cu ta bay ta hopi fuerte.
“Manera mi a bisa, di nos parti y di nos socionan, tur componente y ingrediente tey, p’esey ta e caso. Y un di e tareanan di ATA ta, cu ya caba awe mainta a reuni, y nos ta monitorea hopi di cerca, no solamente e parti di asisti e vuelonan, e schedule, cu e hendenan por regresa nan cas, y hendenan por drenta, no solamente esey ta importante, pero tambe evalua nos mesun crisis di maneho, of maneho interno, pero hopi importante ta cu ya caba a papia awe mainta cu mi kier un resumen di kico ta ‘consumer sentiment’.
Pues, si tin preocupacion di e consumidornan den diferente mercado, pa via di loke ta pasando, y esey lo por conduci na cancelacion. Honestamente, mi no ta anticipa n’esey, pero semper ta bon pa verifica pa nos ta prepara, pasobra mi ta sigur cu di parti di gobierno, entre otro, e pregunta ey lo bin dilanti tambe”, señora Ronella Croes, director di Aruba Tourism Authority, a remarca.
