Parlamentario Jeniffer Arends-Reyes:
ORANJESTAD (AAN)—Enseñanza ta un aspecto cu na Aruba tin cu enfoca hopi riba dje, segun Parlamentario Jeniffer Arends-Reyes, di fraccion di AVP.
Esaki pa motibo cu mester wak e calidad, y esaki den sentido cu locual educadornan ta duna e alumnonan, mester ta di un calidad sumamente halto, tanto den e aspecto di infrastructura como di metodonan di enseñanza y con nan kier yega pa e muchanan caba scol tambe.
“Con cu bay bin Aruba tin e cantidad di ‘drops-out’ cu nos no lo ta desea, nos tin cu wak con nos ta re-dirigi e hobennan aki, pasobra ta importante pa nos como pais, keda enfoca riba cu nos muchanan mester tin un cualificacion inicial, pa nan bay den e mercado laboral tambe cu un diploma den nan man”, Parlamentario Arends-Reyes a señala.
El a agrega cu di chikito caba, esaki e ta keda inculca den e manera cu nan ta wordo siña, pa nan por caba un estudio pa dia di mañan nan por contribui den e area laboral di nos pais. Relaciona cu e hecho cu algun scol no a keda mucho contento cu e cifranan di final di aña escolar, Arends-Reyes a comenta cu el a papia cu diferente scol unda el a wordo bisa cu den e edad aki di e alumnonan, hopi biaha nan ta enfoca riba diferente otro cos, por ehemplo pa nan tin un “side job” pa nan bay traha.
“Pero e enfoke, eigenlijk, si bay atrobe riba e parti social economico di e pais, mester ta pa nan siña, pa nan caba, pa nan no tin tanto cos asina, pa pensa na cas. Mi ta kere cu e parti aki, sigur, mester keda enfoca riba dje, pa nan por keda den e sistema di enseñanza”, Parlamentario Jeniffer Arends-Reyes a señala.
