Marc Figaroa di Aruba Ports Authority
ORANJESTAD (AAN): Marc Figaroa di APA, den un entrevista cu DIARIO a duna un resumen positivo pa loke ta trata pasaheronan crusero. El a remarca cu aña 2025 tabata hopi exitoso y den 2026 e industria ta keda desaroya positivamente. E prome seis luna di aña tabata sumamente positivo y ta spera cu e temporada di high season cu lo cuminsa na october lo ta mas positivo ainda.
Den cuadro di cantidad di pasahero, APA ta indica cu esaki ta proyecta pa mantene na e nivel di aña pasa na unda a procesa 970 mil pasahero y pa e fin di aña aki ta proyecto un crecemento un tiki mas cu esaki.
Segun Figaroa, esaki ta indica cu e tension global den medio oriente ta duna oportunidad cu hendenan ta haci biahenan crusero. Mundialmente, esaki ta comproba door di e grado di ocupacion halto abordo di e barconan crusero.
El a indica cu e barco cu ta haci e itinerario di Sur America, cu ta sali for di Panama y Cartagena (Colombia) ta bin Aruba semanalmente y cu un ocupacion hopi halto. Esaki ta un ruta cu ta dunando su frutonan hopi positivo den ocupacion. Entre otro tambe, barconan Carnival, Norwegan, Princess tambe ta desaroyando positivamente.
“Aruba ta keda un destinacion preferi, e resultadonan tambe di satisfaccion di bishitantenan ta keda uno top den Caribe, especialmente riba Carnival Caribbean unda Aruba ta posiciona como un di e mihonan. Y riba esaki nos a traha a base di mantencion, mehora e producto y sigui mehora y mantene e nivel aki na su luga”, el a enfatisa.
Segun e, globalmente tin mas hende cu ta prefera di haci biahe riba un crusero. Demograficamente, personanan di edad mas jong tambe ta cruise mas mientras cu antes mas tanto personanan riba 50 aña di edad tabata cruise mas. Y tambe actualmente specialmente den Caribe, tin mas famia ta bay un crusero hunto. Esaki ta haci cu e impacto di e grado di ocupacion abordo ta bira mas halto. Carnival y Disney ta ehempelnan di esakinan.
Señor Figaroa a agrega cu Aruba, Corsou y Bonaire ta traha hunto y ta promove nan mes como ABC. Mas fuerte e islanan ta hunto, ta haci e oportunidadnan mas atractivo y keda cu un iterinario mas preferi pa brinda bek na e lineanan crusero.
