Dave Barkmeyer di Meteo:
ORANJESTAD (AAN): Dave Barkmeyer, Director di Departamento Meteorologico Aruba a duna di conoce cu den e simannan aki tin un concentracion varia di stof di Sahara cu ta afectando e region. Pesey tin biaha ta mira cielo mas cera cu otro dia y esey ta conta tambe pa e visibilidad.
E visibilidad por wordo reduci entre 15 pa 20 kilometer. Mester tene cuenta cu na paisnan na Europa y e parti zuid di e continente europeo cu ta hopi cerca di e costa africano y di Sahara mes, nan ta haya situacionnan mas pisa cu e region aki, a remarca , cu visibilidad di menos cu 5 kilometer caminda avionnan tin biaha tin problema.
Na Aruba, por ehempel, hende por haya problema cu respiracion, alergia y nan por bira malo den e temporada aki.
Barkmeyer a agrega cu no ta tur cos ta malo cu ne pasobra e stof di Sahara aki ta fertilisa suelonan. Pero banda di dje, e por trece malesa.
Pa loke ta aviacion y e parti maritimo, e por afecta menos tanto e barconan cu e avionnan cu ta biaha hopi mas veloz. Pero hopi bes e avionnan ta haci uzo di 'slant visibility' cu ta esun vertical y e pilotonan ta mira mucho mas mihor pasobra tin un atmosfera mucho menos cu esun den horizontal pa mira, a splica.
E director di Meteo a enfatisa cu Aruba ta bay keda haya stof di Sahara den concentracionnan varia den e dianan aki y e por dura dos of tres siman, e por bay y por bin bek meymey di aña.
