Segun Aldrich Croes hopi ley mester wordo revisa: --- *Mester brinda mas seguridad, mas calidad
ORANJESTAD (AAN): Continuando cu e entrevista interesante cu e conocido publicista Aldrich Croes, ken a treci dilanti su aporte pa loke ta e proceso di recuperacion di Aruba y otro temanan di interes, el a laga sa cu e no sa detayenan, pero tin un investigacion tumando lugar, relaciona cu e incidente cu e hoben turista.
El a enfatisa cu no mester warda riba e investigacion pa tuma pasonan for di awor pa mehora seguridad den tur aspecto caminda e turista ta drenta den contacto cu servicionan creativo di Aruba como un destinacion turistico.
A agrega cu Oficina di Turismo (ATA) ta haci hopi esfuerso pa promove Aruba internacionalmente pa trece e bishitantenan. Pero no ta keda na ATA of na Gobierno pa haci e producto Aruba e producto cu ta haci cu e turista ta bin bek "y nos ta gana nos pan di dje. E ta conta pa nos tur", a remarca.
E comunicador a agrega cu cada ciudadano di Aruba mester tin e vision y e responsabilidad colectivo pa hunto haci di e producto Aruba un producto cu ta un 'winning product' y cu ta sostene su mes cada bes cu e dal su pasonan pa innova, pa bira miho. Sostenibelmente exitoso, a bisa.
El a sugeri pa revisa hopi di e leynan pa loke ta trata actividadnan manera watersport, transporte publico, tournan off-road. Tambe mester practica seguridad. Bin cu programanan con por minimalisa of mitiga riesgonan innecesario pa e bishitantenan como tambe mehora e calidad di e actividadnan.
"E turista mester sinti cu bo ta cuid'e. No cu bo kier gana su placa so, pero cu bo ta haci lo necesario pa cuida su permanencia durante su vakantie aki na Aruba", a declara.
Finalmente, Croes a manifesta cu Turismo ta e pilar economico di Aruba y Aruba mas cu tur otro pais tabata vulnerabel den e crisis di e pandemia. Pesey mester haci e maximo esfuerso pa proteha Aruba awor cu nos ta recuperando. Mester brinda mas seguridad, mas calidad cu ta locual ta haci cu por aumenta e cantidad di dollar cu ta wordo gasta den e destinacion.
'OVER TOURISM'
Banda di esaki tin raport cu ta indica cu Aruba ya a pasa e linea di 'over tourism" y "nos ta cuminsa afecta nos mes awor ora cu e cantidad sigui crece. Ta e calidad di nos producto mester mehora, pero e calidad di e bishitante tambe, segun nos ta frena cierto desaroyonan pa evita mas volumen, mas calidad".
Calidad ta importante y aworaki den e periodo di recuperacion, esey como publicista y como marketeer e ta boga p'e.
Aldrich Croes a yega di traha cu hopi persona y hopi instancia, pesey e ta desea di duna un contribucion na comunidad den e parti aki di mehoracion di e calidad.
Aruba su producto ta esencial pa por recupera y sigui sostene e recuperacion pa no haya golpinan bek cu ta hiba Aruba bek atras. "Nos tin cu sigui dal pasonan pa dilanti", asina el a finalisa bisando.
