Hulanda ta duna inicio na pakete pa suavisa resultado di crisis --- *Hulanda cu plan sosten di e poder di compra den aumento di prijs --- *Aruba mester di 1.6 Biyon pa baha belasting den crisis mundial
ORANJESTAD(AAN)—Manera ya nos a trece dilanti, awor por mira kico ta bon gobernacion y pakico Hulanda, den cuadro di Statuut, a obliga Aruba pa tuma medida pa evita cu e ta bati bancarota.
Awe ta keda proba kico ta pasa si gobernante hunga San Nicolas cu placa di Pueblo pa haya voto y bisa Pueblo cu despues “orguyosamente” ta paga e debe.
Den contactonan cu DIARIO tin cu Hulanda a bini dilanti con Hulanda den e situacion di emergencia cu e pais conoce, ta efectua un plan pa aumenta e forsa di compra di e Pueblo di Hulanda, cu mescos cu Aruba y resto di mundo, ta victima di un aumento enorme di prijs cu lo sigui subi.
E prijs di petroleo ta hunga un papel pero por spera den e dianan venidero cu atrobe mas factor ta bay hunga un papel den un mundo caminda peligernan nobo ta surgi pa comercio internacional.
Gobierno Hulandes ta bay uza 2.8 Biyon di placa di Pueblo pa yuda Pueblo sigui paga e gastonan cu costo di bida ta contene.
E forma cu Hulanda ta haci esaki ta cu entrante Prome di April e prijs di combustibel ta baha ora Gobierno baha e prijs di accijns (belasting) riba e combustibel.
Na Juli lo baha BTW (loke lo mester reemplasa BBO na Aruba na 2023) riba gas y electricidad.
Gobierno Hulandes tin intencion di subi e sueldo minimo y tambe yuda cu isolacion di casnan pa baha e necesidad pa atende cu e situacion friu den cas.
E medidanan aki di Gobierno Hulandes pues ta permiti Aruba realisa na cual momento ta oportuno pa Gobierno baha belasting y cu cuanto porciento hasta den un crisis Gobierno por baha belasting.
Aruba no por tuma e medida cu Hulanda a tuma pa sostene e poder di compra di e Arubiano cu na 2009 a bira victima di e aplicacion robes di e sistema aki ora a baha BBO cu mita pa despues deshaci di BBO cu a laga Aruba cu e debe nacional conoci.
Por nota con Hulanda ta baha e peso pa Pueblo na un forma responsabel pa asina e e Pueblo di Hulanda tin placa pa gasta na comodidadnan cu bida di tur dia ta exigi.
E loke Gobierno Hulandes a haci awor na forma responsabel ta loke na 2009 a wordo bende cu Aruba riba un base politico sin midi e resultadonan.
Na mes momento por mira awor con Hulanda ta uza 2.8 Biyon pa e pais aumenta e forsa di compra di e Pueblo, loke ta beneficia economia y asina henter e pais.
Ta e razonamento di hinca placa den Pueblo a sirbi pa e plan descabeya di 1.6 Biyon di Bo Aruba, cu atrobe tabata un formula politico cu no a wordo vigila y cu ni Parlamento ni Hulanda por a controla.
Awe Hulanda ta duna prueba con por uza placa di Pueblo pa yuda Pueblo, a base di un gobernacion responsabel den un situacion di guera.
Aruba no tin e 1.6 Biyon cu a wordo gasta e tempo na forma robez pa aumenta poder di compra di e Arubiano, pero si a haci cu generacionnan di Aruba lo mester paga mas belasting mientras nan no tin ni den tempo di guera mundial, reserva pa tene cabez riba awa.
