Defensor di Pueblo cu un bista riba futuro:
* Localidad y infrastructura digital ta urgente!
ORANJESTAD (AAN): Jurima Bryson, despues di a sigui un trayectoria exitoso como abogado, e ta eherciendo e funcion di Ombudsman for di 1 di october 2024, dia cu el a wordo huramenta como e prome 'Ombudsman' (Defensor di Pueblo) di Aruba. Y mas cu claro esaki no por bay sin elogia e hecho cu e ta e prome hende muhe den ocupa e posicion importante aki.
Durante un entrevista cu DIARIO Jurima Bryson a combersa riba diferente tema y awe ta enfoca riba e metanan cu e kier logra a corto plaso.
Mester enfatisa si cu Ombudsman no ta un abogado pasobra nan no por entrega un peticion pa hende na Corte. Ombudsman no por bay Corte pa defende un hende of haci un peticion, el a remarca. Esey ta haci un diferencia caba den loke ta e funcion di Bureau Ombudsman.
Sinembargo, un di e metanan concreto cu Ombudsman kier logra ta pa nan porta habri a corto plaso. El a indica cu ta trahando duro pa esaki y ta haciendo tur cos posibel pa tin tur loke ta necesario manera no solamente un edificio, pero tambe un infrastructura digital, personal y tambe training.
Su deseo tambe ta pa pueblo di Aruba, den un of dos aña, ora di puntra un ciudadano si e conoce Bureau Ombudsman cu e sa cu eynan e por entrega keho y cu e contesta ta si.
Aworaki e ta ripara cu hopi hende no conoce e instancia of cu nan no ta compronde ki sorto di keho si por entrega cerca Ombudsman. Esey ta un di e metanan pa pueblo di Aruba en general por bay compronde kico e instancia aki por significa pa nan y pakico e ta existi.
KINDEROMBUDSMAN
Un otro meta tin di haber cu Kinderombudsman, cu tambe ta un di e metanan cu no solamente kier pa bira un realidad pa prome cu fin di 2025. Kinderombudsman ta un specialista riba e area di mucha y hoben. Pa cu e posicion aki tambe tin cierto metanan cu kier logra pa cu visibilidad di Kinderombudsman y derechonan di mucha en general, Bryson a declara.
Segun ley, Kinderombudsman ta un funcionario cu ta bay traha bao di Ombudsman mes, numa cu e tin su posicion tambe basta independiente cu hunto cu su mesun vision ta bay canalisa na ki direccion kier bay hiba e parti ey di e trabaonan cu Bureau Ombudsman mester haci, Jurima Bryson a finalisa bisando.
