Rubin Ponson di DOW:
ORANJESTAD (AAN): Despues cu recien e poco containernan cu klapchi a yega Aruba, e siman aki autoridadnan a bay cu e proceso normal di habri nan y haci revision. Esaki a socede riba e tereno isola di Wela, den cercania di Rooi Frances.
Aki mes ya caba bo ta mira cu e cantidad di klapchi cu a yega Aruba ta hopi poco. Ta djis algun container ‘chikito’ tin e aña aki. Normalmente ora di papia di ‘Container di Klapchi’, ta papia di 40 pia grandi ‘normal’.
E biaha aki ta klapchinan cu a bin di Merca, y nan ta den cantidad chikito cu a logra drenta den container di 20 pia.
E control a wordo haci riba esnan cu ya caba a yega, y ta sperando ainda riba algun container mas di Klapchi cu tin di yega e dianan venidero. Aunke tin mas container ta yega, toch relativamente e cantidad ta keda hopi tiki si.
Esey ta loke Rubin Ponson, e experto di DOW encarga cu vuurwerk a declara den un entrevista cu DIARIO. Nan ta mik pa logra procesa tur cargamento y keda cla cu esey, prome cu e temporada di bendemento di klapchi cuminza.
E cargamento ta yega ni 50% di e cantidad cu Aruba ta custumbra di ricibi. Segun Ponson a splica, e aña aki Aruba a haci pedido pa 20 container di 40-pia cu klapchi pa wordo importa. Te cu awor, Aruba a ricibi 6 container di 20 pia.
El a splica cu e cantidad cu tin warda ainda den Deposito di Wela ta “tiki”, Si saca e klapchinan bieu pa bende, ta mira claramente cu pa e mercado di Aruba esey ta tiki.
