Produccion di alimento ta bira un gran necesidad na 2023
*Crisis di azeta a bira shock internacional hopi peligroso
*Ya clima a deshaci di 21 porciento di produccion di cuminda
ORANJESTAD (AAN) — Durante e pandemia Covid-19, por a mira con diariamente informacion tabata bini dilanti di companianan grandi y internacional, cu tabata den problema serio.
Hopi atencion a wordo dedica na e resultadonan social di e malesa, cu tabata stroba e normalidad diario na mundo.
Awe mundo ta den un problema mes serio of mas serio cu e Pandemia, cu mundo por a frena cu e entrada di un vacuna.
Na e momentonan aki ta sumamente dificil pa bisa kico lo ta e suerte di hende na mundo den un situacion, caminda tur loke por bay robez, ta bay robez.
DIARIO, como matutino di Pueblo di Aruba, tin e deber sagrado pa mustra Pueblo riba tur loke por ta na caminda pero tambe ofrece formanan den cual por suavisa e resultado di problemanan sumamente grandi cu mundo ta enfrenta.
Den e realidad actual, dos factor sumamente importante ta presenta nan mes.
Na prome lugar e cambio di clima, cu hasta na Aruba ya tur hende mester ripara.
Si antes for di San Juan tabata prepara tereno pa planta pasobra awacero ta na caminda den e tempo cortico di yobida, awe hasta den e riesgo di un tormenta den cercania, cada gota di awacero tabata un bendicion.
Cambio di clima ya ta un problema y menasa serio pa hende, cu a perde casi un cuarto di produccion internacional di cuminda.
Segun cifranan internacional, produccion mundial di cuminda a baha cu 21 porciento.
Kico esaki ta nifica? Un ehempel practica ta papia palabra cla. Si cuatro hende por a come na e mesa di produccion mundial di cuminda, awor ta tres persona so!
Hamber a bira un realidad na mundo, cu mester traha riba e forma pa conserva su medio ambiente, pero tambe mester di energia pa e por biba.
Si hende tabata traha riba un solucion pa bandona petroleo y bolbe na combustibel limpi, awor prome cu hende por a reemplasa petroleo, azeta a bira motibo di guera internacional.
Prijs di petroleo a bira juguete politico mundial, cu tur resultado pa tur prijs na mundo.
Sobrevivi den un bida cu costo sumamente halto pa coriente y awa rond mundo, ta e realidad di tur pais.
Na Francia, Francesnan ta desespera cu e prijsnan di energia. Na Hulanda cantidad di actividad a wordo cancela.
Inglatera ta na careda. Merca, cu ta nos mercado di turismo, no sa kico mas pa haci.
Hasta Putin ta desespera, aunke e ta hunga poderoso pa mundo no mira kico ta e realidad na Rusia y di e Pueblo Ruso.
Aruba mester enfrenta futuro y Aruba mester bolbe planta. Aruba mester bolbe duna un lugar na cria y Aruba mester subi lama pa pisca atrobe.
Nos ta aplaudi awe sigur e trabou di LVV Santa Rosa, cu a a ehecuta plannan valioso pa garantisa pa grandi y chikito tin mas conocemento y disponibilidad pa produci cuminda na Aruba.
Muchanan ta haya oportunidad pa crece cu e saber di posibilidad di produccion di campo y lama no solamente pa haya cuminda pero tambe pa haci negoshi.
E regreso na punto di salida prome cu Aruba a cuminsa depende casi completamente pa cuminsa, ta posibel a base di trabounan cu Arubianonan incansabel y cu bista riba realidad, a haci.
Pa confronta e realidad mundial, Aruba mester ta e Aruba di un solo Pueblo, cu ta lucha pa su existencia.
Grandi y chikito mester yuda produci alimento cu hende mester pero cu ta conoce aumentonan di prijs, cu atrobe ta wordo menasa cu aumento dor di e prijs y instabilidad di petroleo.
Un siman nobo ta cuminsa den un tempo dificil, pero tambe un reto pa grandi y chikito cu mester uni forsa pa futuro atrobe.
Awe produccion local di cuminda ta un necesidad cu no por nenga. LVV Santa Rosa a haci un bon trabou.
Gobierno Wever-Croes no a practica mentira ora ta trata di placa y tabata cauteloso cu e forma cu ta atende cu placa.
Den gremionan tambe por nota e sentido di responsabilidad na un momento historico den cual atrobe futuro a bira reto.
Historia a duna prueba cu Aruba no ta hala atras pa reto. Pues ban prepara pa traha dam, traha reservanan di awa y di tur loke ta necesario, pa enfrenta un tempo dificil cu ta yega na su fin, pa Aruba por sigui cana den e futuro nobo cu ta spera!
