E falta di cumplimento cu Ley di Contabilidad ta expresa su mes --- *Proyectonan PPS tambe ta yuda aumenta e peso grandi di inflacion --- *E maneho di gasta placa awe pa paga despues ta rementa na Aruba
ORANJESTAD(AAN)—Den situacionnan mundial sumamente serio, prijs di gasolin a subi pa henter mundo.
Bida na tur pais di mundo a bira mucho mas caro, mientras balor di bida riba su mes ta wordo cuestiona den un guera mundial espantoso cu menasa di bom nuclear.
Hende no ta hende si e no ta sinti efecto di e situacion mundial excepcional y inespera, cu ta afecta henter mundo cu a kere cu awor e tin espacio pa hala rosea atrobe despues di e crisis provoca pa e Coronavirus nobo.
E situacion mundial actual no ta permiti wega politico cu sentimento humanona ningun pais y sigur no na un pais caminda rapportnan ta papia di un maneho durante Gobierno Mike Eman, cu a scoge pa manda e responsabilidad di pago di debenan pa e fecha di awe.
Manera semper nos a trece dilanti, nos ta uza documentonan oficial pa papia di e situacion cu ta presenta su mes awe na Aruba, cu mester paga prijs mas halto pa gasolin, cu tin un peso extra debi na e proyectonan PPS.
E rapport “Bo Aruba” ta papia directamente di desvaciacion di leynan cu ta proteha interes di Pueblo y ta exigi politiconan pa gasta placa di Pueblo na un forma responsible.
E Ley di Contabilidad cu ta dicidi con politiconan por gasta placa di Pueblo no a wordo sigui dor di Gobierno Mike Eman, cu asina a laga atras na generacionnan nobo e pago di proyectonan pa cual el a dicidi.
E pago di proyectonan PPS pues, a bira un herencia financiero directo pa generacion cu ta na bida awe pero tambe pa generacion cu ainda mester nace.
E proyecto pa colmo no tabata tin vigilancia di Parlamento y pa su caracter ni sikiera por a wordo controla dor di Hulanda, cu a interferi den un situacion financiero mucho mas dramatico pa Aruba.
Aki mester papia directamente di e debe nacional cu a wordo crea a base di e propaganda politico mas destructivo cu e base financiero di Aruba a conoce, cu tabata e reduccion di BBO cu mitar pa despues deshaci di BBO, cu ni Mike Eman no por a logra.
Prijs di gasolin di Aruba ta subi hunto cu prijs di gasolin na tur pais na mundo, pero tin un peso extra pa Aruba cu awe mester paga pa un maneho di Mike Eman cu Hulanda a rechasa a base di Statuut y a nifica introduccion di supervision pa Aruba.
Awe Aruba tabata tin necesidad di un reserva nacional, manera bon gobernacion ta exigi.
Bon gobernacion di un pais no conoce fayo riba presupuesto, no conoce debe pa paga mayan.
Na 2009 Mike Eman tabata na haltura cu e ta hinca Aruba den un aventura si e baha BBO, cu DIARIO no a sostene pa su caracter acumulativo. Pero pa a deshaci di BBO mester a adapta e belastingnan cu a baha ora introduci BBO of nivela e perdida di otro forma.
Awe Aruba ta wordo afecta directamente dor di e debe nacional, cu e mester paga directamente mescos cu e proyectonan PPS cu a haci introduccion di BAVP necesario.
Un peso riba e prijs di gasolin tambe pa Aruba, cu a wordo ciega pa un proyecto fantasma cu yama Citgo y cu awe ta parti directo di un guera mundial, manera nos a adverti na 2018 ora nos a deshaci di e fantasia di Citgo, cu cual a cumpra e votador di Aruba na 2016, ora ya e pais tabata hoga financieramente.
Awe Aruba ta biba cu e resultado di e forma cu a trapa riba Ley di Contabilidad, e ley sagrado cu ta regla con ta gasta placa di Pueblo.
Bon gobernacion a wordo tira den e baki di sushi di wega politico cu a causa cu awe e Pueblo di Aruba no tin e placa cu e mester, e reserna nacional, pa Gobierno por deshaci di parti di accijns di gasolin.
