ORANJESTAD (AAN): Den fin di siman aki a bira conoci, cu Aruba Airlines lo uni cu aerolinea Conviasa di Venezuela, como e dos aerolineanan cu lo bula desde Cuba pa Nicaragua.
E pais centroamericano aki no ta exigi visa pa Cubanonan viaha pa eynan.
Esaki a wordo anuncia pa autoridadnan di aviacion na Cuba. Nan a bisa cu Aruba Airlines lo reanuda e vuelonan pa Nicaragua y Guyana, cu ta dos destino importante pa e Cubanonan.
E aerolinea lo bula e ruta entre Havana y Managua riba Diahuebs 16 di December, Diahuebs 23 di December, y Diahuebs 30 di December. E lo bula entre Havana y Georgetown riba Diabierna 17 di December, Diabierna 24 di December, y Diabierna 31 di December. Pero tambe Diadomingo 19 di December, y Diadomingo 26 di December.
A tuma nota cu e Facebook di Aeropuerto Internacional Jose Martí a pone e informacion aki tambe riba social media.
Di e forma aki, Aruba Airlines ta bay haci mescos cu Conviasa y nan ta bira e dos aerolineanan cu ta bula e rutanan aki.
Tambe tin un aerolinea mas cu ta cubri e ruta aki, y esey ta Copa Airlines di Panama.
Aruba Airlines lo aumenta e opcionnan tambe di e Cubanonan pa viaha pa Guyana, cual ta e pais cu Cubanonan ta viaha pa asina haci tramitenan di visa y reencuentro familiar rumbo pa Merca.
