Fechanan menciona den caso Avestruz ta habri un dimension nobo
*Leoncita lo a haya tereno na culminacion desastre financiero Aruba
*Benny lo a confia Leoncita ora Hulanda a perde confiansa den Mike
ORANJESTAD—Uno di e casonan mas interesante den henter historia moderno di Aruba, ta sin duda e caso Avestruz, cu segun acusacionnan di Huez contra Benny Sevinger, lo ta duna motibo pa papia di crimen organisa.
E papia di “crimen organisa” ta papia di un crimen bon prepara den un circulo cu generalmente ta completamente cera.
Segun vocabulario Arubano, ora papia di por ehempel Mafia, ta papia di crimen organisa pasobra no ta papia por ehempel di un saco di arroz cu un hende ta horta pasobra e ta wordo influencia pa su hamber.
E prome investigacionnan mas profundo di parti di DIARIO, ta relaciona cu e fechanan cu ta wordo menciona ya cu nan ta directamente mara na momentonan sumamente importante pa Gabinete Mike Eman y pa historia di autonomia financiero di Aruba.
E caso Avestruz lo a nace na 2013, cu tabata aña politicamente di hopi importancia pa Aruba, cu riba tereno politico, ta duna impresion di un hipnosis politico enfrente Gobierno Mike Eman.
Na 2013 Aruba tabata bou e impresion, cu Gobierno Mike Eman tabata haci un tremendo trabou y Aruba pa medio di eleccion, a entrega na Gobierno Mike Eman e representacion maximo den Parlamento di Aruba.
Den informacionnan cu DIARIO ta copila, ta bini dilanti cu e impresion cu a wordo crea den opinion publico, tabata cu Mike Eman tabata un super gobernante.
El a crece den voto durante eleccion 2013, ora ya Hulanda tabata tin bista riba Aruba, cu tabata den un situacion financiero serio.
Con serio e situacion financiero di Aruba tabata na 2013, ta bini dilanti den cifranan cu Reino Hulandes tabata conoce y tabata indica cu Aruba tabata den un situacion financiero desastroso cu a exigi Reino Hulandes actua imediatamente despues di e eleccion di 2013, ora Aruba a perde su autonomia financiero y cay bou supervision Hulandes.
Ta den e situacion aki Gobierno Mike Eman, segun acusacionnan cu ta bini dilanti den e caso Avestruz, a produci e araña Benny Sevinger, cu a traha su cas festivo den un circulo pa un parti importante conoci como grupo elitario di AVP for di nacemento di e partido.
Mientras Aruba na 2014 a wordo mara na e neishi di araña di intervenciomn financiero di Reino cu asina a conclui cu Gobierno Mike Eman no a haci su trabou riba tereno di control di placa di Aruba, e araña di terenonan di Aruba a sigui crece.
Ora pone e fechanan hunto, ta topa cu e realidad cu a wordo splica ora Gobierno Mike Eman despues na careda a hala Citgo aden.
E fechanan di entrada di Citgo pa scapa situacion economico y financiero di Aruba cu tabata bay bou awa y e fecha di intervencion Hulandes contra Gobierno Mike Eman, ta cuadra cu a tempo cu e araña di “crimen organisa” y corupcion di Avestruz, den cual Benny Sevinger tabata central, tabata cana.
Pues na e momento cu financiermente Aruba como pais tabata zink, uno di e pio casonan di corupcion den historia di Aruba (manera e proceso legal den Corte ta mustra te awor) tabata desaroya su mes sin cu el a wordo nota dor di Prome Ministro di e tempo, Mike Eman.
Den e caso aki, por mira con Leoncita Arends di e emisora cu ta mara historicamente na AVP, segun acusacion di Huez, lo a ricibi den erfpacht terenonan enorme di Aruba, cu el a bende como proyecto y manera ta parce a haci bon ganashi.
E hecho cu Leoncita a haya e terenonan lo tabata un shock pa votadornan di AVP tambe, cu hasta a puntra pakico Leoncita Arends lo a haya e terenonan aki di gran balor pa proyectonan cu manera tin indicacion a keda den mundo di spirito.
Votadornan di AVP mes lo tin problema grandi cu e forma cu Leoncita a haya dos tereno y di cual uno lo tabata wordo considera cu lo tabata mucho chikito pa Leoncita, loke a haci cu el a haya un tereno adicional.
Fechanan cu ta wordo menciona ta 2013, 2014 y 2015, cu ta hustamente e tempo cu Aruba a cay den poz financiero mientras na 2016 Aruba por a baila un rato cu Citgo, cu tambe a keda fantasma den e totalidad di fantasma cu por mira den gobernacion di Aruba di 2013 pa 2017.
DIARIO lo sigui informa riba tur detaye di uno di e casonan penal mas asombroso den historia penal di Aruba.
