ORANJESTAD (AAN): E siman aki DIARIO a haya sa cu e comerciante Johan Richardson di Zenith Quality Services,
a dicidi na patrocina e 6de klas di su scol stima Pius X School na Dakota pa nan haya curso di CPR y por duna nan mesun famia of cualkier victima awor e prome rescate.
E curso a wordo duna door di John Tromp, kende ta experto na ImSan.
Den un entrevista, John Tromp a splica cu e conocemento di CPR cerca cada ciudadano ta importante. Pasobra bo ta purba na scapa bida di un hende! Ora cu un persona bira malo of a wordo herida, hopi biaha si abo no sa kico pa haci, lo peor ta cu bo ta keda sin haci nada y e victima ta fayece of keda cu consecuencianan permanente.
Muchanan di 6de klas ya por haci tur cos efectivamente. A yega di midi e calidad y condicion di hobennan di edad ey, y nan ta capaz di cubri e les di CPR aki na un forma facil.
Tromp a keda impresiona con e alumnonan di Pius X School a haya e lesnan importante, y ta contento pa mira cu nan ta haci hopi pregunta, y e tabata hopi alcaso. Nan ta bin cu otro punto di bista, compara cu un adulto.
Les di CPR ta wordo duna na Aruba na varios compania, y trahadornan den sector medico. Segun Tromp, scolnan tin espacio pa siña esaki. Nos tur ta hende, y nos tur por yuda otro persona den un emergencia.
Cu e les di CPR, na momento cu bo por capta atencion di e mucha y e tin e forza pa haci e parti practico, tin di corda cu CPR ta esun mas duro y ta cansa hende mas. Pero si e mucha por haci esey bon, anto nan ta cualifica pa haci e paso di emergencia aki.
Den e curso aki no tin examen teoretico, pero ta djis haya e parti practico y nan mester haci esey bon y efectivamente, pa asina nan por haya certificado di participacion.
E curso a wordo duna den sala special di Centro di Bario y Deporte Dakota.
