Meverly Romano PR di DIMP:
ORANJESTAD (AAN)—Den entrevista cu e Relacionista Publico di Departamento di Impuesto (DIMP), señora Meverly Romano, el a menciona cu nan por a compronde cu diferente persona a haya nan mes den un situacion fastioso, pasobra nan tabata tin debe di pago di plach'i number, y DIMP y no ta duna nan mas, un areglo di pago, na e momentonan aki.
“Kiermen, pa nan por paga 2025 nan mester paga e debe atrasa completamente, anto despues paga un parti di 2025 sea nan paga mitad di aña of full.
Anto, tabata tin personanan cu a duna remarca riba dje, pero tur tempo nos ta bisa tur automobilista pa tene cuenta cu e deadline, pasobra nan lo causa despues cu nan ta bay haya extra-gasto.
“Manera cu e fecha final pasa, bo tin 50% ta aplicabel y esey ta algo cu semper nos ta bisa e automobilistanan, y e gran mayoria nos ta contento cu ta scucha pero ainda tin un grupo chikito cu no ta scucha y tin di nan cu hasta a paga aña 2020 y despues di esey no a paga nada mas, pues nan no a paga di 2021 te 2024 y aworaki tin un debe habri di un par di aña inclui e boet y esey tin ora ta yega un par di mil florin, vooral si e persona tin mas cu un auto. Kiermen, esey nos ta keda recomenda tur automobilista pa tene cuenta cu e fechanan final, pa no paga e belasting despues di esey”, Meverly Romano a remarca.
El a accentua cu na momento cu un persona tin auto, e tin responsabilidad di cumpli cu e debernan y belasting ta un di nan, keuring y seguro ta dos di nan.
Meverly a agrega cu algun persona ta durf di upload un seguro caduca, y DIMP no ta tuma nan. Esey ta algo cu DIMP ta bisa e cliente, cu e seguro mester ta na orden y si e no ta na orden y e belasting tampoco, toch e persona no ta haya su plachi.
