Te ora su caso wordo yama dilanti
ORANJESTAD (AAN) Señor Alex Matthew, representante di famia Fernandez Pedra y Chania Fernandez Pedra, ken ta den prizon pendiente di tratamento di su caso, den conferencia di prensa, a reitera cu e hoben ta wordo trata comosifuera e ta culpable caba.
El a expresa cu despues di tanto luna sintando como si e ta culpable, e acusado ta bay papia como si e ta culpable, anto ora scucha Chania awo, compara cu nuebe luna prome ora e wordo deteni y cera, e ta full un otro persona.
“E ta papiando aworaki como si e ta un persona culpable, di con? Pasobra bo ta cera hunto cu hende culpable, bo ta wordo trata manera un hende culpable, kiermen e ora ey caba bo no por defende bo mes”, Matthew a acentua.
Ora e haya un abogado e ta bay papia splik’e kico a pasa, manera un hende culpable. “Door di esey, mester tin e persona aki den un forma apart, of tin cu lague bay te ora cu su caso wordo yama dilanti, bo ta sentenci’e si e mester wordo sentencia ora e ta paga su mesun abogado. E famia y ningun hende ta bisa cu si e haya castigo nan ta bay contra dje. Si e ta haya castigo e ta sinta riba su blaar, manera hende ta bisa, pero dune un chens husto, pa e por defende su mes. Anto Chania t’aworaki no tin un chens husto pa defende su mes, pasobra e no por ni papia, manera un hende normal”, señor Alex Matthew a señala.
El a agrega cu ta obvio cu Chania tin trauma pasobra con cu el a haci’e con cu e suceso a pasa, ta mortonan a sosode.
“Bo tin un sentimento pa e famia, bo tin un sentimento pa e persona cu ta cera, e ta un mucha di 25 aña”, señor Matthew a señala.
