Despues di 40 aña e banco awor full bao maneho di Arubianonan
ORANJESTAD (AAN): Despues di un negociacion extenso AIB Bank N.V. (AIB) a logra finaliza tur e procesonan necesario pa adkiri 100% di e accionnan den Banco di Caribe Aruba N.V.
AIB ta un compania di cual su accionistanan ta 100% local. For di su fundacion na 1987, AIB ta un actor clave den e panorama financiero di Aruba, contribuyendo na e desaroyo economico di e isla atravez di iniciativanan di financiamento strategico. AIB ta reconoce e dinamica constante y cambio di e industria financiero, y ta prepara pa introduci solucionnan financiero y bancario accesibel y innovativo.
Cu un plataforma nobo impulsa pa tecnología digitalisa lo percura pa un experencia bancario personalisa, sin incoveniencia, y lo ofrece un variacion di producto y servicio innovativo, na tempo y na prijs competitivo.
Banco di Caribe Aruba, estableci na aña 1983, a sirbi e comunidad di Aruba pa mas di 40 aña. Su base di cliente leal y experencia amplio lo percura pa un fundeshi fuerte pa crecemento y sinergia. Cu e integracion di e operacionnan di Banco di Caribe Aruba, AIB tin como meta pa haci bon uzo di e capacidadnan combina di su staff profesional pa ofrece solucionnan financiero apropia na un publico mas amplio.
Managing Director di AIB Bank N.V., sr. Frendsel Giel a expresa lo siguiente: “E paso strategico aki ta marca un logro significante pa nos crecemento y posicion den e mercado. Nos ta entusiasma tocante e uso di nos capacidadnan combina pa crea un balor mas grandi ainda pa nos clientenan, accionistanan y nos comunidad en general. Nos strategia lo ta basa riba innovacion cu un vision sostenibel y un acercamento unda e ser humano ta central. Nos obhetivo principal ta pa entrega un experencia unico dor di ofrece servicio y productonan cu ta cuadra cu e necesidadnan y preferencia di e cliente.”
Sr. Giel a enfatiza: “Esaki no ta nifica cu AIB lo bandona e meta pa cual el a wordo funda 37 aña pasa, esta ‘promove proyectonan cu ta importante pa desaroyo economico di Aruba’. Nos lo sigui cu esey pero cu un structura mas solido ainda.” AIB ta ansioso di por colabora cu e team talentoso di Banco di Caribe Aruba pa impulsa exito comparti y genera balor superior na tur stakeholder. Nos kier a gradici tur nos partnernan y conseheronan cu durante e proceso aki a hunga un rol importante den conclui e transaccion aki di un forma exitoso.
Siguiente Pasonan: Den e proximo lunanan, AIB y Banco di Caribe Aruba lo traha estrechamente pa garantisa un transicion optimal y un integracion sin interupcion di operacionnan.
E adkisicion aki ta marca inicio di un capitulo nobo excitante pa AIB, Banco di Caribe Aruba, y e sector financiero Arubano. Nan lo duna mas informacion riba esaki den e lunanan venidero.
