Maritsa Chiquito di DIP:
ORANJESTAD (AAN): Den un entrevista cu DIARIO, señora Maritsa Chiquito di Directie Infrastructuur en Planning (DIP) a duna informacionnan amplio riba e ahustenan cu ta wordo haci pa kavel pa Carnaval 2026. El a menciona cu desde juni aña pasa a cuminsa haci preparacionnan na unda a bin cambionan na e maneho pa Carnaval e aña aki. Y ya pa dia 28 di october a haya aprobacion pa ehecuta e cambionan aki.
Segun señora Chiquito, na 2023 DIP a introduci un maneho y den cua a dicidi cu no ta menciona nomber di ningun persona cu a bin na remarke pa haya kavel. Esaki ta pa proteha e privacidad di ciudadanonan carnavalista. Esaki a sosode tambe durante e dos añan cu a pasa sinembargo DIP a ricibi hopi keho indicando cu no tin transparencia apesar di presencia di notario pa verifica cu e proceso ta encamina bon. Despues di e proceso y di documentacion, e ciudadano ta wordo yama y ta ser avisa cu el a haya kavel.
Den esaki a bin un cambio y lo menciona atrobe e nomber di ciudadano cu ta wordo saca pa haya kavel, hunto cu su number di kavel, pero lo no menciona niun informacion adicional, entre otro number di telefon y adres di cas. Den caso di nombernan similar y cu no a menciona un di dos nomber, e ora e persona ey lo mester warda te ora cu DIP yam’e.
Señora Chiquito a duna di conoce tambe, cu debi na demanda grandi, e aña aki lo bin cu extra kavel dilanti di Talk of the Town. Y tambe ta bin algun kavel adicional riba e ruta di LG. Smith Blvd (y cu entrante awe lo yama Henny Eman Boulevard).
