Esaki ta 13% mas compara cu e luna anterior
ORANJESTAD (AAN): Aruba Airport Authority N.V. (AAA) ta raporta riba e resultadonan di Aeropuerto Internacional Reina Beatrix (AUA Airport) pa November 2021; un otro luna mas cu resultado satisfactorio di recuperacion en comparacion cu e mesun luna na 2019.
Na November 2021, AUA Airport a procesa 85,346 pasahero cu a viaha for di Aruba. Esaki ta 13% mas compara cu e luna anterior.
Durante e luna tras di lomba AUA Airport a recupera 87% di e cantidad di pasaheronan cu a viaha for di Aruba durante e mesun luna na 2019.
Den November 2021, 65,928 pasahero (pax) a viaha pa Merca, 2,442 pax pa Canada, 6,397 pax pa Europa, 3,638 pax pa Antiyas Hulandes y 6,941 pax pa Latino America.
Un “outbound passenger load factor” (PLF) averahe (cantidad di asiento ocupa di e cantidad total di asiento disponibel riba e avion ora di sali for di AUA Airport) pa e mercado Mericano di 74% a keda raporta durante e luna di November 2021, mientras e PLF averahe pa tur otro mercado tabata na 76% durante e mesun temporada (pa comparacion, na 2019 e PLF pa tur mercado tabata 85%).
Durante e ultimo luna, AUA Airport a atende un averahe di 30 buelo pa dia, menos compara cu e 35 vuelonan pa dia cu tabata wordo procesa den e mesun temporada na 2019.
Den e mesun temporada den 2020 nos atende solamente 481 vuelo despues cu frontera nacional a habri bek na Juli 2020 pa operacionnan comercial.
