Director Roderick Croes:
- Director ta admiti cu den e dienst falta personal
- Pa servicio pafo tin un scarcedad di 40 trahado
ORANJESTAD (AAN) Director di Aduana, señor Roderick Croes ta reconoce e hecho cu na e Dienst aki falta di personal pa brinda un servicio optimal. Croes a bisa cu esaki no ta algo nobo y lo tin solucion p’e. Nan ta trahando riba un proceso nobo di seleccion di trahadornan cu lo drenta dienst. E contratonan ta bay ta riba termino largo, pero esaki no ta bay sosode di awe pa mañan, e lo tuma su tempo. El a expresa cu na final di dia, intencion ta pa duna un servicio mas eficiente y agil.
Pa loke ta trata fondonan pa trece trahador cualifica, segun señor Croes no ta cu tin un problema, sino cu ta depende di con cada gobierno nan prioridadnan ta, nan ta wak su parti di begroting, y con nan ta regl’e, con por planifica e seleccion di trahado y su procedure, despues di esey tambe e lesnan di Aduana cu tin cu tuma lugar, e docentenan cu tin cu duna les, y con esey ta afecta e dunamento di servicio tambe.
Director señor Croes a elabora tambe riba e rekisitonan pa tuma trahado na Aduana. Nan ta mescos cu gobierno, kiermen e aspirante mester ta den edad mas abao di 29 aña, mester tin alomenos MAVO diploma, y ta exigi cijfer di 7 of mas pa Hulandes, Ingles, Wiskunde y Boekhouden. Nan ta purba di wak si por haya e Hulandes manera ley ta exigi, cu ta mas halto.
Y mescos cu pa solicita pa polis, Aduana ta pidi certificado di bon conducta, test sicologico y test medico pa wak con e persona su salud ta, y tambe ta pidi sport test. “Kiermen, nos ta haci diferente test prome cu tuma un hende den servicio”, Director señor Roderick Croes a subraya.
El a comenta tambe cu pa duna servicio pafo Aduana falta hopi personal. E ta calcula, basa den un testing normal, cu falta 40 trahado, pero lamentablemente no por tuma e cantidad aki pasobra e lo pone un peso hopi grandi pa gobierno y pa Aduana mes.
