ORANJESTAD (AAN): Riba Diaranson caba varios consumidor a ripara cu cierto berdura fresco cu ta yega for di Merca, no tabata poni ainda den Supermarketnan.
Varios producto mas tambe tabata bashi den reki di diferente tienda.
Trahadornan di Supermarket tabata bisa clientenan cu ta e carga no a yega ainda desde siman pasa.
Departamento di Aduana a tuma nota cu e barco di Miami no a yega na e horario indica siman pasa. E barco tabata na tempo e siman aki si. Pero lamentablemente loke esaki a ocasiona ta un atraso cual ta significa mas declaracion y carga e siman aki.
Departamento di Aduana ta trata na haci lo maximo na momento cu ricibi peticion pa servicio. Pues teniendo esaki na cuenta, ta pidi cooperacion di tur comerciante pa hunto nos sali di e problematica ocasiona pa tercera.
Alavez, Departamento di Aduana ta pidi comerciantenan pa pone suficiente persona disponibel pa baha container pa asina por yuda e siguiente comerciante y trata na haci menos fout na momento di traha declaracion y exit-note. Yuda nos yuda boso.
Departamento di Aduana Aruba ta spera di por a informa debidamente.
